NEET Protest : NEET आंदोलनात पंतप्रधान मोदींविरोधात आक्षेपार्ह वक्तव्य तरुणीला पडलं महागात

जंतर-मंतर आंदोलनातील व्हिडिओ सोशल मीडियावर व्हायरल; BNS अंतर्गत गुन्हा दाखल 

दिल्ली: दिल्लीतील जंतर-मंतर येथे झालेल्या NEET-UG आंदोलनादरम्यान पंतप्रधान नरेंद्र मोदी (PM Narendra Modi) यांच्याविरोधात कथित आक्षेपार्ह आणि अपमानास्पद वक्तव्य केल्याप्रकरणी २५ वर्षीय रुचिका सिंग हिच्याविरोधात प्रथम माहिती अहवाल (FIR) दाखल करण्यात आला आहे. व्हिडिओ सोशल मीडियावर व्हायरल झाल्यानंतर या प्रकरणाची दखल घेत पोलिसांनी कारवाई सुरू केली आहे. (NEET Protest)

पोलिसांच्या माहितीनुसार, गाझियाबादमधील वसुंधरा येथील रहिवासी आणि सर्वोच्च न्यायालयातील वकील स्मृती सिंह यांनी या प्रकरणी तक्रार दाखल केली. तक्रारीत २३ जुलै रोजी सोशल मीडियावर व्हायरल झालेल्या व्हिडिओचा उल्लेख करत, आंदोलनादरम्यान रुचिका सिंग यांनी पंतप्रधानांविरोधात सार्वजनिकरित्या आक्षेपार्ह भाषा वापरल्याचा आरोप करण्यात आला आहे. तक्रारीनुसार, या वक्तव्यांमुळे घटनात्मक पदाच्या प्रतिष्ठेला धक्का पोहोचला असून सार्वजनिक शांतता भंग होण्याची शक्यता निर्माण झाली. (PM Modi)

तपासादरम्यान पोलिसांनी आरोपीची ओळख नोएडाच्या सेक्टर १६८ येथील लोटस झिंग सोसायटीत राहणारी रुचिका सिंग अशी पटवली. तिच्याविरोधात भारतीय न्याय संहिता (BNS) कलम ३५२, ३५३(१) आणि ३५६(१) अंतर्गत झिरो एफआयआर नोंदवण्यात आला आहे. त्यानंतर पुढील तपासासाठी हे प्रकरण दिल्ली पोलिसांकडे वर्ग करण्यात आले आहे. (NEET Controvesry)

प्राथमिक माहितीनुसार, घटनेनंतर रुचिका सिंग आणि तिचे कुटुंबीय संपर्काबाहेर असून पोलीस त्यांचा शोध घेत आहेत. ती मूळची हरियाणातील फरीदाबाद जिल्ह्यातील उंचगाव येथील रहिवासी असून, तिचे ब्युटी पार्लर आहे. यावर्षीच्या सुरुवातीला तिने नोएडामध्ये फ्लॅट खरेदी केल्याची माहितीही पोलिसांनी दिली आहे. (Legal Action)

व्हायरल व्हिडिओमध्ये रुचिका सिंग पंतप्रधानांविषयी आक्षेपार्ह भाषा वापरत असल्याचा दावा केला जात आहे. या व्हिडिओनंतर सोशल मीडियावर तीव्र प्रतिक्रिया उमटल्या असून, काहींनी तिच्या वक्तव्याचा निषेध केला आहे. मात्र, व्हिडिओतील दावे आणि संबंधित परिस्थितीची सत्यता तपासाअंतीच स्पष्ट होणार आहे. (BJP Government)