Nashik Simhastha Kumbh Mela : कावनईत गंगा-गोदावरी पूजन, कुंभमेळ्यातील स्नानाची आणखी एक तारीख जाहीर

Nashik Simhastha Kumbh Mela : पुढील वर्षी नाशिक आणि त्र्यंबकेश्वर येथे सिंहस्थ कुंभमेळा होणार असून, त्यासाठी कोट्यवधी रुपयांची विकासकामे सुरू आहेत. मात्र सिंहस्थ कुंभाचे मूळ स्थान मानल्या जाणाऱ्या इगतपुरी तालुक्यातील श्रीक्षेत्र कपिलधाराकडे अद्यापही अपेक्षित लक्ष दिले जात नसल्याची चर्चा आहे. याच पार्श्वभूमीवर कावनई येथे गंगा-गोदावरी पूजन सोहळा पार पडला. या कार्यक्रमात मंत्री छगन भुजबळ (Minister Chhagan Bhujbal) यांनी विकासकामांबाबत मोठी घोषणा केली, तर वैष्णव आखाड्यांनी कपिलधारा (Kapildhara) येथील पारंपरिक स्नानाची तारीखही अधिकृतपणे जाहीर केली.

जिल्ह्यात ११६ कोटी रुपयांची विकासकामे सुरू

कावनई येथे आयोजित गंगा-गोदावरी पूजन सोहळ्यात मंत्री छगन भुजबळ यांनी श्रीक्षेत्र कपिलधारा हे सिंहस्थाशी ऐतिहासिक आणि धार्मिकदृष्ट्या जोडलेले महत्त्वाचे तीर्थक्षेत्र असल्याचे सांगितले. या परिसराचा सर्वांगीण विकास, पर्यावरण संवर्धन आणि भाविकांसाठी आवश्यक सुविधा उभारण्यासाठी राज्य शासन कटिबद्ध असल्याचे त्यांनी स्पष्ट केले. पुढे त्यांनी सांगितले की, मागील सिंहस्थानंतर परिसरात रस्ते, सिमेंट काँक्रीट रस्ते, तलाव विकास, रिंग रोडसह विविध पायाभूत सुविधा उभारण्यात आल्या असून उर्वरित कामेही टप्प्याटप्प्याने पूर्ण केली जातील. आगामी सिंहस्थाच्या तयारीसाठी नाशिक, त्र्यंबकेश्वर आणि जिल्हाभरात सुमारे ११६ कोटी रुपयांची विकासकामे सुरू असल्याची माहितीही त्यांनी दिली. (Nashik Simhastha Kumbh Mela)

गोदावरीसह सर्व जलस्रोत स्वच्छ ठेवण्याचे आवाहन

देश-विदेशातून लाखो भाविक येणार असल्याने रस्ते, वाहतूक, पार्किंग, पिण्याचे पाणी, स्वच्छता, निवास व्यवस्था आणि इतर मूलभूत सुविधा सक्षम करण्यासाठी शासन नियोजनबद्ध पद्धतीने काम करत असल्याचे भुजबळ यांनी सांगितले. तसेच गोदावरीसह सर्व जलस्रोत स्वच्छ आणि प्रदूषणमुक्त ठेवण्याचे आवाहन करत पर्यावरण संवर्धनासाठी वृक्षारोपणावरही भर देण्याची गरज त्यांनी व्यक्त केली. आमदार हिरामण खोसकर यांनी ग्रामपंचायत, तीर्थक्षेत्र विकास समिती आणि प्रशासनाच्या समन्वयातून तयार करण्यात आलेल्या विकास आराखड्याची प्रभावी अंमलबजावणी करून प्रलंबित कामे तातडीने पूर्ण करण्याची मागणी केली. तसेच कुंभमेळ्याच्या तयारीसाठी सर्व संबंधित विभागांची संयुक्त बैठक घेऊन नियोजनबद्ध कार्यवाही करण्याचे आवाहन त्यांनी केले.(Nashik Simhastha Kumbh Mela)

कपिलधारा प्राचीन आणि पवित्र तीर्थक्षेत्र

यावेळी वैष्णव आखाड्यांच्या प्रतिनिधींनी श्रीक्षेत्र कपिलधारा येथे होणाऱ्या पारंपरिक स्नानाची तारीख १७ ऑगस्ट २०२७ अशी अधिकृतपणे जाहीर केली. तसेच सिंहस्थ प्राधिकरणाच्या अधिकृत नियोजनात कपिलधारा (Kapildhara) तीर्थक्षेत्राचा समावेश करण्याची मागणीही त्यांनी केली. संत-महंतांनी कपिलधारा हे प्राचीन आणि पवित्र तीर्थक्षेत्र असल्याचे सांगत त्याच्या धार्मिक वारशाचे जतन करण्याबरोबरच भाविकांसाठी अधिक सुविधा निर्माण करण्याची गरज व्यक्त केली. महंत फलाहारी महाराज यांनी या तीर्थक्षेत्राच्या विकासासाठी शासनाने विशेष प्रयत्न करावेत, अशी मागणी केली. कार्यक्रमाला लोकप्रतिनिधी, प्रशासनातील अधिकारी, संत-महंत आणि भाविक मोठ्या संख्येने उपस्थित होते.