Russian Missile Attack : रशियाच्या क्षेपणास्त्र हल्ल्यात ४ भारतीय खलाशांचा मृत्यू; भारताचा संताप, रशियन राजदूतांना समन्स

नवी दिल्ली : युक्रेनच्या किनारपट्टीजवळील व्यापारी मालवाहू जहाजावर झालेल्या रशियन हल्ल्यात चार भारतीय खलाशांचा मृत्यू झाल्याने भारताने तीव्र नाराजी व्यक्त केली आहे. या गंभीर घटनेनंतर केंद्र सरकारने भारतातील रशियाचे प्रभारी राजदूत व्लादिमीर लदानोव्ह यांना समन्स बजावत अधिकृत निषेध नोंदवला असून, या हल्ल्याबाबत स्पष्टीकरणही मागितले आहे. (Russian Missile Attack)

परराष्ट्र व्यवहार मंत्रालयाने या घटनेला अत्यंत गंभीर मानत निष्पाप भारतीय नागरिकांच्या मृत्यूबाबत चिंता व्यक्त केली आहे. भारताने या हल्ल्याची कठोर शब्दांत निंदा करत दोषींवर जबाबदारी निश्चित करण्याची मागणी केली आहे. (Russian Missile Attack)

ओडेसा बंदरातून निघालेल्या जहाजावर हल्ला :

माहितीनुसार, १९ जुलै रोजी संध्याकाळी युक्रेनमधील ओडेसा बंदरातून रवाना होत असलेल्या 'एमव्ही गोल्डन लिओ' या गिनी-बिसाऊच्या ध्वजाखालील मालवाहू जहाजावर क्षेपणास्त्र हल्ला झाला. धान्याची वाहतूक करणाऱ्या या जहाजावर एकूण १७ क्रू सदस्य होते, त्यापैकी पाच भारतीय होते. या हल्ल्यात चार भारतीयांचा मृत्यू झाला असून एक भारतीय गंभीर जखमी झाला आहे. त्याच्यावर रुग्णालयात उपचार सुरू असल्याची माहिती देण्यात आली आहे. (Russian Missile Attack)

रशियाला भारताचा स्पष्ट संदेश :

घटनेनंतर परराष्ट्र व्यवहार मंत्रालयाने नवी दिल्लीतील रशियन प्रभारी राजदूतांना बोलावून भारताचा तीव्र निषेध नोंदवला. मंत्रालयाने स्पष्ट केले की, व्यापारी जहाजे आणि निष्पाप नागरी खलाशांना लक्ष्य करणे कोणत्याही परिस्थितीत स्वीकारार्ह नाही. भारताने रशियाला या घटनेबाबत आपली चिंता कळवली असून परिस्थितीवर बारकाईने लक्ष ठेवले जात असल्याचेही सूत्रांनी सांगितले. (Russian Missile Attack)

परराष्ट्र मंत्रालयाचे कठोर वक्तव्य :

परराष्ट्र मंत्रालयाने जारी केलेल्या निवेदनात म्हटले आहे की, "चार भारतीय नागरिकांचा दुर्दैवी मृत्यू झाला असून एक जण गंभीर जखमी आहे. व्यापारी जहाजांवर आणि निष्पाप नागरी खलाशांवर हल्ला करणे पूर्णपणे अस्वीकार्य आहे." याशिवाय मंत्रालयाने पुन्हा एकदा स्पष्ट केले की, व्यावसायिक जहाजांना लक्ष्य करणे, नागरी क्रू सदस्यांच्या जीवाशी खेळणे आणि आंतरराष्ट्रीय नौकानयन तसेच व्यापाराच्या स्वातंत्र्यात अडथळा निर्माण करणे हे अत्यंत निंदनीय असून असे हल्ले तात्काळ थांबवले गेले पाहिजेत. (Russian Missile Attack)

युक्रेनने रशियावर ठपका :

युक्रेनच्या अधिकाऱ्यांनी या हल्ल्यासाठी थेट रशियाला जबाबदार धरले आहे. रशिया-युक्रेन युद्ध सुरू असताना व्यापारी जहाजांवर होणारे हल्ले आणि त्यात निष्पाप परदेशी नागरिकांचा बळी जाण्याच्या घटनांमुळे आंतरराष्ट्रीय स्तरावरही चिंता व्यक्त केली जात आहे. या घटनेमुळे भारत-रशिया संबंधांच्या पार्श्वभूमीवरही या प्रकरणाकडे विशेष लक्ष दिले जात असून, जखमी भारतीयाच्या उपचारांसह मृतांच्या कुटुंबीयांना आवश्यक मदत पुरवण्यासाठी भारत सरकार प्रयत्न करत आहे. (Russian Missile Attack)