Harbour Line Block : हार्बर मार्गावर चार दिवस मध्यरात्री विशेष ट्रॅफिक ब्लॉक

काही लोकल सेवा रद्द; प्रवाशांसाठी महत्त्वाची सूचना

मुंबई : मुंबईकरांची जीवनवाहिनी असलेल्या उपनगरीय रेल्वे सेवेतील हार्बर मार्गावर ( Harbour Line Block) प्रवास करणाऱ्या प्रवाशांसाठी एक अत्यंत महत्त्वाची बातमी आहे. मस्जिद आणि सँडहर्स्ट रोड स्थानकांदरम्यान रेल्वेच्या पायाभूत सुविधा अधिक बळकट करण्यासाठी 'स्लीपर नूतनीकरण' हाती घेण्यात आले आहे. या तांत्रिक कामासाठी मध्य रेल्वे प्रशासनाने १५ ते १९ जुलै या कालावधीत सलग चार रात्री विशेष ट्रॅफिक आणि पॉवर ब्लॉक जाहीर केला आहे. ( Mumbai Local)

हा ब्लॉक दररोज मध्यरात्री १:१५ ते पहाटे ४:१५ या वेळेत छत्रपती शिवाजी महाराज टर्मिनस ते वडाळा रोड दरम्यान घेण्यात येईल. सुरक्षिततेच्या दृष्टीने रेल्वेचे रूळ आणि संबंधित यंत्रणेची देखभाल करणे अत्यावश्यक असल्याने, या तांत्रिक कामासाठी ब्लॉक घेणे रेल्वे प्रशासनाला गरजेचे वाटले आहे. रेल्वे प्रवाशांच्या सुरक्षेला प्राधान्य देत, या काळात हार्बर मार्गावरील वाहतूक काही काळासाठी नियंत्रित केली जाणार आहे.ब्लॉकच्या कालावधीत हार्बर मार्गावरील काही लोकल फेऱ्या रद्द करण्यात आल्या आहेत, तर काही गाड्यांच्या मार्गात बदल करण्यात आले आहेत. ( Mumbai Local News)

पनवेल मार्गिकेवरील सेवा मात्र नियमित वेळापत्रकानुसारच सुरू राहणार आहेत. या ब्लॉकमुळे प्रवाशांना होणाऱ्या गैरसोयीबद्दल मध्य रेल्वे प्रशासनाने दिलगिरी व्यक्त केली आहे. रेल्वेच्या सुरक्षिततेसाठी आणि प्रवासाचा अनुभव सुखकर करण्यासाठी ही कामे महत्त्वाची आहेत. तरीही, प्रवाशांनी रेल्वे प्रशासनाच्या सूचनांकडे लक्ष द्यावे आणि प्रवासाचे नियोजन करण्यापूर्वी वेळापत्रकाची अधिकृत खात्री करावी, असे आवाहन मुख्य जनसंपर्क अधिकारी डॉ. स्वप्नील निला यांनी केले आहे. ( Traffic Block)

रद्द करण्यात आलेल्या गाड्या

१५ ते १८ जुलै या कालावधीत छत्रपती शिवाजी महाराज टर्मिनसवरून रात्री २२:५४ आणि पहाटे ०४:२८ वाजता सुटणाऱ्या गोरेगाव लोकल पूर्णपणे रद्द राहतील. तसेच, १६ ते १९ जुलै दरम्यान मध्यरात्री ००:०२ वाजता गोरेगाव स्थानकावरून सुटणारी गोरेगाव-सीएसएमटी लोकलही रद्द करण्यात आली आहे. ( Local Train Update)

गाड्यांच्या वेळेत आणि मार्गात बदल

वांद्रेवरून रात्री २२:२४ वाजता सुटणारी लोकल वडाळा रोड स्थानकापर्यंतच चालवली जाईल. त्याचप्रमाणे, गोरेगाववरून सकाळी ०५:३३ वाजता सुटणारी लोकल, पहाटे ०६:१० वाजता वडाळा रोड स्थानकावरून पुढील प्रवासासाठी सुटेल. (Mumbai Local)

पहिली आणि शेवटची लोकल

ब्लॉकपूर्वी सीएसएमटीकडून गोरेगावला जाणारी शेवटची लोकल रात्री २२:२४ वाजता असेल, तर गोरेगावहून येणारी शेवटची लोकल रात्री २३:३३ वाजता सुटेल. ब्लॉकनंतरची पहिली लोकल पहाटे ०४:५६ वाजता सीएसएमटीकडून आणि ०५:०५ वाजता गोरेगावहून सुटेल.