FIFA World Cup 2026 Egypt vs Belgium : इजिप्तच्या आनंदावर बेल्जियमने फेरलं पाणी; विश्वचषकातील सामना १-१ ने बरोबरीत

फिफा विश्वचषक २०२६ मधील गट ‘जी’च्या सामन्यात बेल्जियम आणि इजिप्त यांच्यात १-१ अशी रंगतदार बरोबरी झाली. मात्र या निकालामुळे इजिप्तचा स्टार फुटबॉलपटू मोहम्मद सलाहचा ३४ वा वाढदिवस संस्मरणीय ठरण्याऐवजी निराशाजनक ठरला. इजिप्त विजयाच्या उंबरठ्यावर असताना बेल्जियमने दुसऱ्या सत्रात पुनरागमन करत सामना बरोबरीत सोडवला. (FIFA World Cup 2026 Egypt vs Belgium)

सिएटल येथे झालेल्या या सामन्यात इजिप्तने सुरुवातीपासूनच आक्रमक खेळ केला. पहिल्या हाफमध्ये इमाम अशूरने शानदार गोल करत इजिप्तला १-० अशी आघाडी मिळवून दिली. केविन डी ब्रुयन ज्या भागातून थोड्याच वेळापूर्वी गोलचा प्रयत्न करत होता, त्याच भागातून अशूरने अचूक फटका मारत थिबॉ कोर्ट्वाला कोणतीही संधी दिली नाही. (FIFA World Cup 2026 Egypt vs Belgium)

विश्वचषकाच्या इतिहासात इजिप्तने आघाडी घेतल्याची ही केवळ दुसरी वेळ ठरली. यापूर्वी २०१८ मध्ये सौदी अरेबियाविरुद्ध मोहम्मद सलाहने गोल करत संघाला आघाडी मिळवून दिली होती. (FIFA World Cup 2026 Egypt vs Belgium)

दुसऱ्या सत्रात बेल्जियमने जोरदार पुनरागमनाचा प्रयत्न केला. केविन डी ब्रुयनचा फ्री-किकचा प्रयत्न थेट पोस्टला लागून परत आला. त्यानंतर सलाहनेही गोल करण्याची संधी निर्माण केली, मात्र त्याचा हेडर कोर्ट्वाने उत्कृष्ट बचाव करत रोखला. (FIFA World Cup 2026 Egypt vs Belgium)

सामना निर्णायक टप्प्यात पोहोचत असताना बेल्जियमचे प्रशिक्षक रुडी गार्सिया यांनी ६५ व्या मिनिटाला रोमेलू लुकाकूला मैदानात उतरवले. हा निर्णय तात्काळ फायदेशीर ठरला. थॉमस म्युनियरच्या क्रॉसवर लुकाकूच्या उपस्थितीमुळे इजिप्तचा बचावपटू मोहम्मद हानी गोंधळला आणि चेंडू स्वतःच्याच जाळ्यात ढकलला. त्यामुळे बेल्जियमला १-१ अशी बरोबरी साधता आली. (FIFA World Cup 2026 Egypt vs Belgium)

सामन्याच्या अखेरीस इजिप्तने बचावावर भर दिला आणि बेल्जियमला आणखी गोल करू दिला नाही. अखेर दोन्ही संघांना प्रत्येकी एका गुणावर समाधान मानावे लागले. या निकालामुळे सात वेळा आफ्रिका कप ऑफ नेशन्स जिंकणाऱ्या इजिप्तचा विश्वचषकातील पहिल्या विजयाचा प्रतीक्षाकाल आणखी वाढला आहे. विश्वचषकातील त्यांच्या चौथ्या सहभागातही विजयाचे खाते उघडण्यात त्यांना अपयश आले. आता इराण आणि न्यूझीलंडविरुद्धच्या पुढील सामन्यांत इजिप्तला विजयाची संधी असेल. (FIFA World Cup 2026 Egypt vs Belgium)

दुसरीकडे, बेल्जियमच्या ‘गोल्डन जनरेशन’साठी हा कदाचित अखेरचा विश्वचषक मानला जात आहे. केविन डी ब्रुयन, थिबॉ कोर्ट्वा आणि रोमेलू लुकाकू यांसारख्या अनुभवी खेळाडूंवर संघाच्या यशाची जबाबदारी असून, रशिया २०१८ मधील तिसऱ्या स्थानापेक्षा सरस कामगिरी करण्याचे त्यांचे लक्ष्य आहे. (FIFA World Cup 2026 Egypt vs Belgium)