Shirdi Sai Baba : साईबाबांना १ कोटींचा सुवर्ण मुकूट अर्पण; लखनौमधील साईभक्ताच्या भक्तीची शिर्डीसह देशभरात चर्चा

शिर्डी : शिर्डीच्या (Shirdi) साईदरबारात श्रद्धा, भक्ती आणि दानशूरतेचं आणखी एक अनोखं उदाहरण समोर आलं आहे. सोन्याच्या वाढत्या किंमतींच्या पार्श्वभूमीवरही साईभक्तांची किती श्रद्धा आहे, याचा प्रत्यय पुन्हा एकदा आला आहे. लखनौ येथील साईभक्त गोविंद गोयल यांनी साईबाबांना तब्बल १ कोटी रुपये किमतीचा सुवर्ण मुकूट अर्पण केला असून, या दानाची शिर्डीसह देशभरात चर्चा रंगली आहे.

शुक्रवारी झालेल्या मध्यान्ह आरतीदरम्यान गोविंद गोयल आणि त्यांच्या कुटुंबियांनी साईबाबांच्या (Sai Baba) चरणी हा सुवर्ण मुकूट अर्पण केला. या मुकुटाचे वजन सुमारे ७८२ ग्रॅम असून, सध्याच्या बाजारभावानुसार त्याची किंमत जवळपास १ कोटी १० लाख रुपये असल्याची माहिती भाविकांनी दिली. मंदिरात विधिवत पूजा आणि आरती पार पडल्यानंतर हा सुवर्ण मुकूट साईबाबांना समर्पित करण्यात आला. या विशेष प्रसंगी मंदिर परिसरात उपस्थित असलेल्या हजारो भाविकांनी हा ऐतिहासिक क्षण अनुभवला. या दानशूरतेबद्दल साई संस्थानच्या वतीने मुख्य कार्यकारी अधिकारी गोरक्ष गाडीलकर यांनी गोविंद गोयल आणि त्यांच्या परिवाराचा सत्कार करून आभार व्यक्त केले. मुकुट अर्पण सोहळ्यानंतर मंदिर परिसरात या दानाची मोठ्या प्रमाणावर चर्चा सुरू होती.

शिर्डी साई संस्थानला दरवर्षी कोट्यवधी रुपयांचं दान (Donation)

शिर्डी हे देश-विदेशातील कोट्यवधी साईभक्तांचे श्रद्धास्थान मानले जाते. दररोज हजारो भाविक साईबाबांच्या दर्शनासाठी शिर्डीत दाखल होत असतात. अनेक भाविक आपली श्रद्धा व्यक्त करण्यासाठी रोख रक्कम, सोने-चांदीच्या वस्तू, मौल्यवान दागिने तसेच विविध स्वरूपातील भेटवस्तू साई संस्थानला अर्पण करतात. आता या परंपरेत एक कोटी रुपयांहून अधिक किमतीच्या सुवर्ण मुकुटाची भर पडली आहे.

विशेष म्हणजे, गेल्या काही वर्षांत सोन्याच्या किंमतींमध्ये मोठी वाढ झाली असली तरी साईभक्तांकडून सोन्याच्या वस्तू आणि दागिने दान करण्याचा ओघ कायम असल्याचे दिसून येत आहे. श्रद्धा आणि विश्वासाच्या भावनेतून भाविक साईचरणी आपले योगदान देत असल्याचे या घटनेतून पुन्हा अधोरेखित झाले आहे.

गोविंद गोयल परिवाराने साईबाबांप्रती असलेली आपली निष्ठा, भक्ती आणि कृतज्ञता व्यक्त करण्यासाठी हा सुवर्ण मुकूट अर्पण केल्याचे सांगितले जात आहे. मध्यान्ह आरतीच्या वेळी हा मुकुट अर्पण झाल्यानंतर अनेक भाविकांनी या दानशूरतेचे स्वागत केले. साईबाबांवरील श्रद्धा आणि विश्वास हीच सर्वात मोठी संपत्ती असल्याच्या भावना अनेकांनी व्यक्त केल्या.

शिर्डीतील साईभक्तीचा जागतिक स्तरावर प्रभाव

दरम्यान, शिर्डी साई संस्थानकडे दरवर्षी कोट्यवधी रुपयांचे दान जमा होत असते. रोख रक्कम, सोने, चांदी, दागिने आणि इतर मौल्यवान वस्तूंच्या माध्यमातून भाविक आपली श्रद्धा व्यक्त करत असतात. अशा प्रकारच्या सुवर्णदानामुळे शिर्डीतील साईभक्तीचा प्रभाव केवळ भारतापुरता मर्यादित नसून जागतिक(Global) स्तरावर पोहोचल्याचे पुन्हा एकदा अधोरेखित झाले आहे.

एकीकडे वाढती महागाई आणि आर्थिक आव्हाने असताना, दुसरीकडे श्रद्धा, भक्ती आणि विश्वासाच्या बळावर भाविक साईचरणी आपलं सर्वस्व अर्पण करत असल्याचे हे उदाहरण पुन्हा एकदा शिर्डीत पाहायला मिळाले आहे. त्यामुळे गोविंद गोयल यांनी अर्पण केलेला हा सुवर्ण मुकूट सध्या शिर्डीतील भाविकांमध्ये आणि देशभरातील साईभक्तांमध्ये चर्चेचा विषय ठरला आहे.