CUET-UG 2026 : NEET पेपरफुटीचा वाद सुरू असतानाच CUET परीक्षेत मोठा गोंधळ! तांत्रिक बिघाडामुळे विद्यार्थ्यांना २ तास प्रतीक्षा; पालक-विद्यार्थ्यांचा संताप

देशभरात NEET पेपरफुटी प्रकरणामुळे आधीच राष्ट्रीय परीक्षा व्यवस्थेवर प्रश्नचिन्ह उपस्थित होत असताना, आता कॉमन युनिव्हर्सिटी एन्ट्रन्स टेस्ट (CUET-UG 2026) परीक्षेदरम्यान झालेल्या मोठ्या तांत्रिक गोंधळामुळे पुन्हा एकदा नॅशनल टेस्टिंग एजन्सी (NTA) टीकेच्या केंद्रस्थानी आली आहे. परीक्षा केंद्रांवर तांत्रिक अडचणी निर्माण झाल्याने अनेक विद्यार्थ्यांना तब्बल दोन तास प्रतीक्षा करावी लागली, तर काही ठिकाणी परीक्षा नियोजित वेळेपेक्षा उशिराने सुरू करण्यात आली.

NEET नंतर आता CUET मध्येही गोंधळ :

गेल्या काही महिन्यांपासून NEET पेपरफुटी प्रकरणामुळे NTA वर सातत्याने टीका होत आहे. महाराष्ट्रासह देशभरात या प्रकरणाची चौकशी सुरू असून अनेक आरोपींना अटक करण्यात आली आहे. अशा परिस्थितीत विद्यार्थ्यांच्या भवितव्याशी संबंधित आणखी एका महत्त्वाच्या परीक्षेत गोंधळ झाल्याने विद्यार्थी आणि पालकांमध्ये नाराजीचे वातावरण निर्माण झाले आहे. (CUET-UG 2026)

नेमकं काय घडलं?

३० मे रोजी आयोजित करण्यात आलेल्या CUET-UG 2026 परीक्षेदरम्यान विविध परीक्षा केंद्रांवर तांत्रिक बिघाड झाल्याची माहिती समोर आली. परीक्षा घेण्यासाठी NTA ची भागीदार संस्था असलेल्या TCS (टाटा कन्सल्टन्सी सर्व्हिसेस) च्या प्रणालीमध्ये तांत्रिक अडचण निर्माण झाल्यामुळे परीक्षा वेळेत सुरू होऊ शकली नाही. यामुळे अनेक विद्यार्थ्यांना परीक्षा केंद्रात बसून दीर्घकाळ प्रतीक्षा करावी लागली. काही ठिकाणी परीक्षेची प्रक्रिया सुरू होण्यास तब्बल दोन तासांचा विलंब झाला. (CUET-UG 2026)

वेळापत्रकात ऐनवेळी बदल :

NTA ने दिलेल्या माहितीनुसार, तांत्रिक बिघाडामुळे दुपारच्या सत्रातील परीक्षेचे वेळापत्रकही बदलावे लागले. नियोजनानुसार दुपारी ३ वाजता सुरू होणारी परीक्षा एक तास उशिराने म्हणजे सायंकाळी ४ वाजता सुरू करण्यात आली. तसेच विद्यार्थ्यांना दुपारी अडीच वाजल्यापासून केंद्रात प्रवेश देण्यात आला. याशिवाय सकाळी ९ वाजता सुरू होणाऱ्या पहिल्या सत्रातील परीक्षेलाही उशीर झाला. अनेक केंद्रांवर परीक्षार्थींना प्रतीक्षेत बसावे लागल्याने तणावपूर्ण वातावरण निर्माण झाले. (CUET-UG 2026)

NTA चे स्पष्टीकरण :

या प्रकरणावर प्रतिक्रिया देताना NTA ने सांगितले की, परीक्षेदरम्यान झालेल्या तांत्रिक बिघाडाची माहिती TCS कडून मिळाली होती. मात्र संबंधित अडचण तातडीने दूर करण्यात आली असून कोणत्याही विद्यार्थ्याचे शैक्षणिक नुकसान होणार नाही याची खबरदारी घेण्यात आली आहे. NTA च्या म्हणण्यानुसार, उशिरामुळे विद्यार्थ्यांचा वेळ वाया जाऊ नये म्हणून सर्व परीक्षार्थींना नियमानुसार पूर्ण परीक्षा कालावधी उपलब्ध करून देण्यात आला आहे. (CUET-UG 2026)

सोशल मीडियावर संतापाची लाट :

घटनेनंतर अनेक विद्यार्थ्यांनी आणि पालकांनी सोशल मीडियावर संताप व्यक्त केला. राष्ट्रीय स्तरावरील महत्त्वाच्या प्रवेश परीक्षांमध्ये वारंवार होणाऱ्या तांत्रिक आणि प्रशासकीय त्रुटींवर प्रश्न उपस्थित करण्यात आले. NEET पेपरफुटीच्या वादानंतरही NTA ने पुरेशी खबरदारी घेतली नसल्याचा आरोप अनेकांनी केला. (CUET-UG 2026)

परीक्षा व्यवस्थेवर पुन्हा प्रश्नचिन्ह :

देशातील लाखो विद्यार्थ्यांच्या उच्च शिक्षणाचे भविष्य ठरवणाऱ्या परीक्षा NTA मार्फत घेतल्या जातात. मात्र NEET पेपरफुटी, निकालांवरील वाद आणि आता CUET परीक्षेतील तांत्रिक गोंधळ यामुळे परीक्षा व्यवस्थेच्या विश्वासार्हतेवर पुन्हा एकदा प्रश्नचिन्ह निर्माण झाले आहे. विद्यार्थ्यांच्या भवितव्याशी संबंधित अशा परीक्षांमध्ये अधिक सक्षम तांत्रिक व्यवस्था आणि पारदर्शक नियोजनाची गरज असल्याची मागणी आता जोर धरू लागली आहे. (CUET-UG 2026)