IPL 2026 : आयपीएल २०२६ मध्ये आज (21 मे) गुजरात टायटन्स आणि चेन्नई सुपर किंग्स यांच्यात अहमदाबादच्या नरेंद्र मोदी स्टेडियमवर हायहोल्टेज सामना रंगणार आहे. हा आयपीएल २०२६ चा ६६ वा साखळी सामना असून ऋतुराज गायकवाडच्या नेतृत्वाखालील सीएसकेसाठी हा सामना डु ऑर डाय ठरणार आहे. चेन्नईने आतापर्यंत १३ पैकी ६ सामने जिंकले असून संघ १२ गुणांसह सातव्या स्थानावर आहे. प्लेऑफच्या शर्यतीत टिकून राहण्यासाठी सीएसके ला हा सामना कोणत्याही परिस्थितीत जिंकावा लागणार आहे. दुसरीकडे, गुजरात टायटन्स आधीच प्लेऑफसाठी पात्र ठरली आहे. शुभमन गिलच्या नेतृत्वाखाली गुजरातने 13 पैकी 8 सामने जिंकत 16 गुणांसह गुणतालिकेत दुसरे स्थान मिळवले आहे.
हेड टू हेडमध्ये गुजरातची आघाडी
IPL इतिहासात दोन्ही संघांमध्ये आतापर्यंत 9 सामने झाले आहेत. यात गुजरातने 5 आणि चेन्नईने 4 सामने जिंकले आहे. या हंगामातील पहिल्या सामन्यात गुजरातने चेन्नईचा 8 विकेट्सने पराभव केला होता.
पिच रिपोर्ट
अहमदाबादच्या नरेंद्र मोदी स्टेडियमवरील खेळपट्टी फलंदाजांसाठी अनुकूल मानली जाते. सपाट विकेटमुळे मोठ्या धावसंख्येचा सामना पाहायला मिळू शकतो. सुरुवातीला वेगवान गोलंदाजांना थोडी मदत मिळण्याची शक्यता आहे.
दोन्ही संघांची संभाव्य प्लेइंग-12
गुजरात टायटन्स: शुभमन गिल (कर्णधार), साई सुदर्शन, जोस बटलर (यष्टीरक्षक), वॉशिंग्टन सुंदर, निशांत सिंधू, राहुल तेवतिया, जेसन होल्डर, राशिद खान, अर्शद खान, कागिसो रबाडा, मोहम्मद सिराज आणि प्रसिद्ध कृष्णा.
चेन्नई सुपर किंग्स: ऋतुराज गायकवाड (कर्णधार), संजू सॅमसन (यष्टीरक्षक), उर्विल पटेल, कार्तिक शर्मा, डेवाल्ड ब्रेविस, शिवम दुबे, प्रशांत वीर, अकील हुसेन, अंशुल कंबोज, स्पेन्सर जॉन्सन, नूर अहमद आणि मुकेश चौधरी.