नवी दिल्ली : भारतीय कुस्तीपटू विनेश फोगाटला उत्तेजक चाचणी देण्यासाठी गैरहजर राहिल्याप्रकरणी इंटरनॅशन टेस्टिंग एजन्सी (आंतरराष्ट्रीय चाचणी एजन्सी) अर्थात आयटीएकडून कारणे दाखवा नोटीस बजावण्यात आली आहे. या नोटीसला सात दिवसांत उत्तर देणे विनेशसाठी बंधनकारक आहे. विनेशने वर्षभरात केलेली ही पहिली चूक आहे.
नोटीस का दिली आहे ?
नियमांनुसार आंतरराष्ट्रीय कुस्तीपटूंना नियमितपणे आयटीएची उत्तेजक चाचणी द्यावी लागते. या चाचणीला कोणतेही कारण न देता गैरहजर राहिल्यामुळे आयटीएने विनेश फोगाटला नोटीस बजावली आहे. नियमानुसार वर्षभरात तीन वेळा चाचणीला गैरहजर राहिल्यास संबंधित खेळाडूवर दोन वर्षांची बंदी लागू शकते.
विनेशची गेल्यावर्षी १८ डिसेंबरला ६० मिनिटांची चाचणी होणार होती. पण या चाचणीला विनेश गैरहजर राहिली. नोंदणीकृत आंतरराष्ट्रीय कुस्तीपटूंची सकाळी ६ ते रात्री ११ दरम्यान कधीही आयटीएकडून उत्तेजक चाचणी घेतली जाते. या चाचणीला गैरहजर राहिल्यास आयटीएला सबळ कारण द्यावे लागते. विनेशने गैरहजर राहण्याचे कारण देताना हरियाणा विधानसभेच्या अधिवेशनाला उपस्थित होते असे सांगितले होते. या पार्श्वभूमीवर आयटीएने ठोस पुराव्यांसह स्वतःची बाजू मांडण्याची संधी देण्यासाठी विनेशला कारणे दाखवा नोटीस बजावली आहे. या नोटीसला समाधानकारक उत्तर दिले नाही तर विनेश विरोधात कारवाई होण्याची शक्यता आहे.