मुंबई : नीट युजी परीक्षेला बसलेल्या विद्यार्थ्यांना त्रास होऊ नये म्हणून रेल्वे प्रशासनाने मेगाब्लॉकच्या नियोजनात बदल केला आहे. शनिवारी-रविवारी मध्य रेल्वेच्या मुख्य मार्गावर आणि ट्रान्स हार्बर मार्गावर विशेष ब्लॉक आहे. सीएसएमटी ते विद्याविहार दरम्यान अप - डाऊन धीम्या मार्गांवर रविवारी रात्री १२.०५ ते पहाटे ५.०५ या वेळेत ब्लॉक आहे.
सीएसएमटीहून सुटणाऱ्या धीम्या मार्गावरील गाड्या विद्याविहारपर्यंत जलद मार्गावर वळवण्यात येतील. त्या भायखळा, परळ, दादर, माटुंगा, शीव आणि कुर्ला स्थानकांवर थांबतील. घाटकोपरकडून येणाऱ्या अप गाड्यांनाही याच पद्धतीने जलद मार्गावर वळवून प्रमुख स्थानकांवर थांबे देण्यात येणार आहेत.
डाऊनची शेवटची लोकल शनिवारी रात्री ११.१६ वाजता सीएसएमटीहून टिटवाळ्यासाठी सुटेल तर अपची शेवटची लोकल कल्याणहून शनिवारी रात्री १०.२२ वाजता सुटेल. ब्लॉकनंतर सीएसएमटीहून कसाराकडे पहिली लोकल रविवारी पहाटे ५.०७ वाजता, तर टिटवाळाहून सीएसएमटीकडे पहिली लोकल रविवारी पहाटे ४.१२ वाजता सुटणार आहे.
ट्रान्स हार्बर मार्गावर ठाणे ते वाशी/नेरुळ दरम्यान रात्री ११.४५ ते पहाटे ४.४५ या वेळेत अप आणि डाऊन मार्गांवर ब्लॉक असल्यामुळे रेल्वे वाहतूक पूर्ण बंद राहणार आहे. या कालावधीत काही गाड्या रद्द करण्यात आल्या आहेत. ब्लॉकपूर्वी ठाणे-पनवेल शेवटची लोकल शनिवारी रात्री ११.१४ वाजता सुटेल, तर वाशीहून ठाण्याकडे शेवटची गाडी शनिवारी रात्री १०.४५ वाजता सुटेल. ब्लॉकनंतर ठाण्याहून पनवेलसाठी पहिली लोकल पहाटे ५.१२ वाजता, तर पनवेलहून ठाण्यासाठी पहाटे ४.३३ वाजता सुरू होणार आहे.
