Online LPG bookings : ऑनलाइन एलपीजी बुकिंंगमध्ये ९८ टक्क्यांनी वाढ; शासनाच्या कडक कारवाईमुळे ग्राहकांच्या विश्वासात वाढ

मुंबई : एलपीजी उपलब्धतेबाबत ग्राहकांमध्ये विश्वास आणि सकारात्मक बदल दिसून येत आहेत. इंधन टंचाईची भीती आणि त्यादरम्यान होणारी अतिरिक्त खरेदी आता कमी झाली आहे. दरम्यान ग्राहकांचा आत्मविश्वास वाढला आहे. शासनाने केलेली कडक कारवाई, नियमित पुरवठा आणि पारदर्शक उपायांमुळे विनाअडथळा गॅस मिळण्याची खात्रीही ग्राहकांना पटली आहे. यामुळे ग्राहक अधिक जागरूक झाले आहेत. परिणामी अतिरिक्त साठा कमी झाला असून डिजिटल माध्यमांचा वापर वाढला आहे.

देशव्यापी मोहिमेचा भाग म्हणून, मार्च २०२६ पासून १ लाख २८ हजाराहून अधिक तपासण्या आणि छापे टाकण्यात आले आहेत. या कारवाईमध्ये ५९ हजाराहून अधिक एलपीजी सिलिंडर जप्त करण्यात आले. साठा करून ठेवणे, काळाबाजार रोखणे, घरगुती गॅसचा गैरवापर थांबवणे आणि वितरण व्यवस्थेत पारदर्शकता आणणे हा या कारवाईमागील मुख्य उद्देश आहे.

सुरळीत कामकाजाचा भाग म्हणून शासनाने गॅस वितरकांवरील देखरेख अधिक कडक केली आहे. यामुळे नियमांचे पालन होण्याबरोबरच सर्व स्तरातील ग्राहकांना समान हक्क मिळण्यास मदत मिळेल. आधुनिक तंत्रज्ञानाच्या वापरामुळे ग्राहकांचा अनुभव बदलत आहे. संपूर्ण उद्योग क्षेत्रात ऑनलाइन बुकिंगचे प्रमाण ९८ टक्केपर्यंत वाढले आहे. तसेच ओटीपी आधारित वितरण सेवा ९२ टक्क्यांपर्यंत पोहोचली आहे. यामुळे इंधन सेवेमधील पारदर्शकता, सुविधा आणि जबाबदारीपूर्वक कामाचे चित्र सुधारले आहे. देशभरातील एलपीजी वितरण व्यवस्था मजबूत असल्याचे पुन्हा एकदा सिद्ध होत आहे. घरगुती सिलिंडरची मागणी वाढलेली असताना कुठेही तुटवडा असल्याचे चित्र नाही. एकाच दिवसात ५१ लाखांहून अधिक कुटुंबांना सिलेंडर पोहोचविण्यात आले आहेत. ग्राहकांना पुरवठा सुरळीत व्हावा आणि त्यांच्या मागण्या पूर्ण व्हाव्या यासाठी अनेक वितरक रविवारी देखील काम करत आहेत.

त्याचबरोबर, इतर क्षेत्रांमधील पुरवठाही स्थिर ठेवण्याकडे लक्ष केंद्रित करण्यात आले आहे. अन्न प्रक्रिया, वस्तू निर्मिती आणि शेतीशी संबंधित मोठ्या कामांसाठी लागणाऱ्या इंधनाचा पुरवठा आता पुन्हा नियमित करण्यात आला आहे. २३ मार्चपासून १० लाखांहून अधिक व्यावसायिक सिलिंडरची विक्री झाली आहे.