Pandharpur Acid attack : धक्कादायक! पंढरपुरात तरुणीवर अॅसिड हल्ला; आरोपी फरार

- राज्यात वाढत्या अत्याचारांमुळे नागरिकांचा संताप

राज्यात महिलांवरील अत्याचाराच्या घटना थांबण्याचे नाव घेत नाहीत. एकीकडे अशोक खरात प्रकरणामुळे संतापाची लाट उसळलेली असतानाच, दुसरीकडे अहिल्यानगरमधील अॅसिड हल्ल्याचे प्रकरण अद्याप ताजे असतानाच आणखी एक धक्कादायक घटना समोर आली आहे. पंढरपूर (Pandharpur) येथे एका तरुणीवर अॅसिड हल्ला झाल्याने परिसरात भीतीचे वातावरण निर्माण झाले आहे.

शिर्डी तालुक्यातील अॅसिड हल्ल्यातील आरोपी अद्याप पोलिसांच्या ताब्यात आलेला नाही, त्यातच पंढरपुरातील या नव्या घटनेने नागरिकांमध्ये संताप वाढला आहे. २१ वर्षीय वैष्णवी भागवत असे पीडित तरुणीचे नाव असून, अज्ञात इसमाने तिच्यावर अॅसिडसदृश द्रव फेकल्याची प्राथमिक माहिती समोर आली आहे. तिला तातडीने शहरातील खासगी रुग्णालयात दाखल करण्यात आले असून तिच्यावर उपचार सुरू आहेत.

दरम्यान, उपमुख्यमंत्री एकनाथ शिंदे (Eknath Shinde) यांचा पंढरपूर दौरा सुरू असतानाच ही घटना घडल्याने प्रशासनातही खळबळ उडाली आहे. पोलिसांनी तात्काळ तपास सुरू केला असून परिसरातील सीसीटीव्ही फुटेज तपासले जात आहे. मात्र, आरोपी अद्याप फरार असल्याने नागरिकांमध्ये भीतीचे वातावरण आहे.

घटनेनंतर पीडितेच्या नातेवाईकांनी रुग्णालयात धाव घेतली. “आम्हाला फोन आला आणि आम्ही पेट्रोल पंपाजवळ पोहोचलो, तेव्हा माझ्या मुलीवर अॅसिड टाकल्याचं समजलं. अशा प्रकारचे कृत्य कुणावरही होऊ नये,” असे भावनिक आवाहन पीडितेच्या आईने केले.

दरम्यान, जिल्ह्यातील करमाळा तालुक्यातील वरकटणे येथे आणखी एक धक्कादायक घटना समोर आली आहे. धनगर समाजातील मेंढपाळ आणि एका महिलेला काठीने मारहाण करण्यात आल्याचा व्हिडिओ सोशल मीडियावर व्हायरल झाला आहे. या घटनेमागील कारण अद्याप स्पष्ट झाले नसून पोलीस तक्रार दाखल करण्याची प्रक्रिया सुरू आहे.