The Black Market : वाडीबंदर परिसरातून ४५१ सिलिंडरसह ४० लाखांचा मुद्देमाल जप्त

मुंबई : दक्षिण मुंबईतील वाडीबंदर परिसरात अवैध गॅस साठवणूक आणि वाहतूक करणाऱ्या रॅकेटचा शिधावाटप यंत्रणेने पर्दाफाश केला आहे. एका गुप्त माहितीच्या आधारे टाकलेल्या धाडीत यंत्रणेने ४५१ सिलिंडर आणि ८ वाहनांसह तब्बल ४० लाख ६१ हजार ७१६ रुपयांचा मुद्देमाल जप्त करण्यात आला आहे.

मिळालेल्या माहितीनुसार, वाडीबंदर ब्रीज आणि डोंगरी परिसरात गॅस सिलिंडरची अवैध वाहतूक होत असल्याची गोपनीय माहिती शिधावाटप व संचालक नागरी पुरवठा विभागाचे नियंत्रक चंद्रकांत डांगे यांना मिळाली होती. त्यानुसार डांगे यांनी दिलेल्या विशेष आदेशांनंतर या परिसरात सापळा रचण्यात आला. या मोहिमेत गॅस सिलिंडरची अवैध वाहतूक करणाऱ्या ८ गाड्या ताब्यात घेण्यात आल्या. त्यात घरगुती आणि व्यावसायिक वापराचे एकूण ४५१ सिलिंडर आढळून आले.

ही कारवाई उपनियंत्रक (अंमलबजावणी) गणेश बेल्लाळे आणि उपनियंत्रक (परिमंडळ 'अ') माधुरी शिंदे यांच्या संयुक्त मार्गदर्शनाखाली पार पडली. प्रत्यक्ष घटनास्थळी सहाय्यक शिधावाटप अधिकारी प्रदीप यादव यांच्या नेतृत्वाखाली पथकाने हा सापळा यशस्वी केला. या पथकात भूपेंद्र गवळी, महेश देशपांडे, राहुल साळुंखे यांच्यासह अन्य १४ कर्मचाऱ्यांचा समावेश होता.

काळाबाजार खपवून घेणार नाही

"जीवनावश्यक वस्तूंचा काळाबाजार किंवा अवैध साठवणूक करून सर्वसामान्यांची लूट करणाऱ्यांविरुद्ध ही मोहीम उघडण्यात आली आहे. अशा प्रकारची कृत्ये कोणत्याही परिस्थितीत खपवून घेतली जाणार नाहीत. येणाऱ्या काळातही संशयास्पद हालचालींवर आमचे बारीक लक्ष असेल आणि यापेक्षाही कठोर कारवाई केली जाईल," असा इशारा चंद्रकांत डांगे यांनी यावेळी दिला. या प्रकरणातील आरोपींवर जीवनावश्यक वस्तू कायद्यांतर्गत गुन्हा दाखल करण्याची प्रक्रिया सुरू असून, या रॅकेटची मुळे नेमकी कुठे पोहोचली आहेत, याचा शोध प्रशासन घेत आहे.