नवी दिल्ली : देशाच्या विमान वाहतूक क्षेत्रात मोठी झेप घेत, पंतप्रधान नरेंद्र मोदी यांनी उत्तर प्रदेशातील जेवर येथे नोएडा आंतरराष्ट्रीय विमानतळ या महत्त्वाकांक्षी प्रकल्पाच्या पहिल्या टप्प्याचे उद्घाटन केले. या प्रकल्पामुळे दिल्ली-एनसीआर परिसरातील हवाई कनेक्टिव्हिटीला मोठी चालना मिळणार आहे.
या उद्घाटन सोहळ्यास देशाचे पंतप्रधान नरेंद्र मोदी, उत्तर प्रदेशचे मुख्यमंत्री योगी आदित्यनाथ आणि राज्यपाल आनंदीबेन पटेल उपस्थित होते. सार्वजनिक-खाजगी भागीदारी (PPP) मॉडेलवर सुमारे ११,२०० कोटी रुपयांच्या गुंतवणुकीत हा प्रकल्प उभारण्यात आला आहे.
दिल्ली-एनसीआरसाठी दुसरे मोठे हवाई केंद्र
नोएडा आंतरराष्ट्रीय विमानतळ हे दिल्ली-एनसीआरसाठी दुसरे आंतरराष्ट्रीय प्रवेशद्वार ठरणार असून, सध्या मोठ्या प्रमाणात वाहतूक हाताळणाऱ्या इंदिरा गांधी आंतरराष्ट्रीय विमानतळ वरील ताण कमी करण्यास मदत होणार आहे. वाढत्या प्रवासी संख्येमुळे निर्माण होणाऱ्या दबावाचे योग्य व्यवस्थापन या नव्या विमानतळामुळे शक्य होईल.
या विमानतळाचा पहिला टप्पा दरवर्षी सुमारे १.२ कोटी प्रवासी हाताळण्यासाठी तयार करण्यात आला आहे. पुढील विस्तार टप्प्यांमध्ये ही क्षमता तब्बल ७ कोटी प्रवाशांपर्यंत वाढवण्याचे नियोजन आहे. त्यामुळे भविष्यातील वाढत्या हवाई प्रवासासाठी ही सुविधा सज्ज राहणार आहे.
आधुनिक सुविधा आणि 24x7 कार्यरत
विमानतळावर ३,९०० मीटर लांबीची धावपट्टी असून मोठ्या आणि लांब पल्ल्याच्या उड्डाणांसाठी ती सक्षम आहे. आधुनिक नेव्हिगेशन प्रणाली, इन्स्ट्रुमेंट लँडिंग सिस्टीम आणि अत्याधुनिक एअरफिल्ड लायटिंगमुळे हा विमानतळ सर्व हवामानात आणि २४ तास कार्यरत राहू शकणार आहे.
कार्गो हब आणि रोजगारनिर्मितीला चालना
या प्रकल्पात कार्गो हब, लॉजिस्टिक्स नेटवर्क आणि एमआरओ सुविधा उभारण्याचेही नियोजन आहे. त्यामुळे केवळ प्रवासी वाहतूकच नव्हे, तर औद्योगिक आणि व्यापार क्षेत्रालाही मोठा फायदा होणार आहे.
भारताच्या विमान वाहतूक स्वप्नाला बळ
नोएडा आंतरराष्ट्रीय विमानतळामुळे भारताच्या जागतिक विमान वाहतूक केंद्र बनण्याच्या ध्येयाला गती मिळणार आहे. आधुनिक पायाभूत सुविधा, वाढती क्षमता आणि भविष्योन्मुख नियोजन यामुळे हा प्रकल्प देशाच्या विकासातील एक महत्त्वाचा टप्पा मानला जात आहे.