अहमदाबाद : आयसीसी टी-२० विश्वचषक २०२६ आता निर्णायक टप्प्यात पोहोचला असून रविवारी नरेंद्र मोदी स्टेडियमवर क्रिकेट विश्वातील दोन बलाढ्य संघ आमने-सामने येणार आहेत. सलामीच्या 'सुपर ८' सामन्यात भारत आणि दक्षिण आफ्रिका यांच्यात जोरदार टक्कर पाहायला मिळणार असून, उपांत्य फेरीची वाट सुकर करण्यासाठी हा सामना दोन्ही संघांसाठी अत्यंत महत्त्वाचा आहे. दुसरा सामन्यात म्हणजे २६ फेब्रुवारी भारत विरुद्ध श्रीलंका आणि १ मार्चला भारत विरुद्ध वेस्ट इंडिज असा सामना खेळवला जाणार आहे.
भारतीय संघाने साखळी फेरीत पाकिस्तानसारख्या कट्टर प्रतिस्पर्ध्याला धूळ चारत सलग ४ विजय मिळवले आहेत. दुसरीकडे, दक्षिण आफ्रिकेनेही सलग ४ सामने जिंकून आपली ताकद दाखवून दिली आहे. दोन्ही संघ तुल्यबळ असले तरी भारताची मजबूत फलंदाजी आणि भेदक गोलंदाजी पाहता टीम इंडियाचे पारडे जड मानले जात आहे.
भारतीय संघासाठी सध्या सर्वात मोठी चिंतेची बाब म्हणजे सलामीवीर अभिषेक शर्माचा फॉर्म. मागील तिन्ही सामन्यांत त्याला एकही धाव काढता आलेली नाही (सलग ३ डक्स). अशा स्थितीत कर्णधार सूर्यकुमार यादव त्याला पुन्हा संधी देतो की संघात बदल करतो, याकडे सर्वांचे लक्ष लागले आहे. भारताकडे कर्णधार सूर्यकुमार यादव, तिलक वर्मा, हार्दिक पांड्या, शिवम दुबे, रिंकू सिंग आणि अक्षर पटेल अशी स्फोटक फलंदाजांची फळी आहे. गोलंदाजीत जसप्रीत बुमराह, अर्शदीप सिंग यांच्या सोबतीला कुलदीप यादव आणि वरुण चक्रवर्ती यांची फिरकी दक्षिण आफ्रिकेच्या फलंदाजांची फिरकी घेऊ शकते.
अहमदाबादची खेळपट्टी सुरुवातीला फलंदाजांना पोषक असते, मात्र जसजसा खेळ पुढे जातो, तसतसे फिरकीपटू प्रभावी ठरतात. त्यामुळे नाणेफेक जिंकणारा संघ प्रथम फलंदाजी करून मोठी धावसंख्या उभारण्याचा प्रयत्न करेल.दक्षिण आफ्रिकेची गोलंदाजी भारतीय फलंदाजांना कशी रोखते यावर सामन्याच भवितव्य अवलंबून आहे.
कगिसो रबाडा, मार्को जेन्सन, लुंगी एनगिडी, केशव महाराज असे चांगले गोलंदाज त्यांच्याकडे आहेत. फलंदाजीतही एडन मार्क्रम (कर्णधार), क्विंटन डी कॉक, रायन रिकल्टन, डेवाल्ड ब्रेविस, डेविड मिलर, ट्रिस्टन स्टब्स, रासी व्हॅन डेर डूसन, हेन्रिच क्लासेन असे नामवंत फलंदाज आहेत ते चांगली धवसंख्या उभारु शकतात.भारताविरुद्ध मोठ्या आयसीसी स्पर्धांमध्ये विजय मिळवणे हे त्यांच्यासाठी आव्हानात्मक राहिले आहे, त्यामुळे हा सामना त्यांच्यासाठी प्रतिष्ठेचा आहे.
