मुंबई : मुंबईच्या पश्चिम उपनगरांतील सांताक्रुझ पश्चिम येथून एक धक्कादायक बातमी आली आहे. सांताक्रुझ पश्चिमेच्या दिघे चाळ येथे एका खोलीत सिलेंडरचा स्फोट झाला. या सिलेंडर स्फोटामुळे चार जण जखमी झाल्याचे प्राथमिक वृत्त आहे. सर्व जखमींना तातडीने रुग्णालयात दाखल करण्यात आले आहे. सर्व जखमींवर वैद्यकीय उपचार सुरू आहेत.
सिलेंडर स्फोटाची घटना आज म्हणजेच गुरुवार १९ फेब्रुवारी २०२६ रोजी संध्याकाळी घडल्याची माहिती अग्निशमन दलाने दिली आहे. माहिती मिळताच अग्निशमनदलाचे पथक तातडीने घटनास्थळी पोहोचले. आवश्यक ती कारवाई करून अग्निशमनदलाने थोड्याच वेळात आग नियंत्रणात आणली. सर्व जखमींना रुग्णालयांत पाठवण्यात आले.
व्ही. एन. देसाई रुग्णालयाच्या प्रशासनाने दिलेल्या माहितीनुसार सिलेंडर स्फोटात जखमी झालेल्या चार जणांना रुग्णालयात दाखल करण्यात आले. या जखमींपैकी तीन जणांना पुढील उपचारांसाठी एलटीएमजी सायन रुग्णालयात हलविण्यात आले आहे. सर्व जखमींबाबतची सविस्तर माहिती रुग्णालय प्रशासनाने प्रसारमाध्यमांना दिली आहे.
जखमींची नावं
- जावेद अब्दुल शियाख, वय ३० वर्षे - ५५ ते ६० टक्के भाजले - एलटीएमजी सायन रुग्णालयात हलवले.
- अवंतिका अजय गावडे, वय ४५ वर्षे - ३० टक्के भाजले - एलटीएमजी सायन रुग्णालयात हलविण्यात आले.
- सुमती रमेश गावडे, वय ६५ वर्षे - ३५ ते ४० टक्के भाजले - एलटीएमजी सायन रुग्णालयात हलविण्यात आले.
- यश गावडे , १५ वर्षे - १० ते १२ टक्के भाजले - प्रकृती स्थिर.