मुंबई: नागरिकांना महानगरपालिकेच्या रुग्णालयात उपलब्ध रुग्णशया व अतिदक्षता विभागातील रुग्णाशय्या इत्यादी खाटांची माहिती ही डॅशबोर्ड स्वरूपात महानगरपालिकेच्या पोर्टल वर उपलब्ध करून देण्यासाठी प्रशासनास निर्देश देण्यात आले असून सद्यस्थितीत या डॅश बोर्डची तपासणी सुरू असून लवकरात लवकर नागरिकांना ही सेवा उपलब्ध होणार आहे ,यामुळे आता नागरिकांना एका क्लिक वर एकूण रुग्णशय्या आणि रुग्ण भरतीसाठी उपलब्ध असलेल्या रुग्णशया इत्यादीची माहिती मिळणार आहे. त्यामुळे नागरिकांना रुग्णाला दाखल करताना ही माहिती मिळणार असल्याने त्यांचा रुग्णालयातील हेलफाटे आणि वेळ वाचला जाईल, अशी माहिती मुंबई महापालिकेचे सार्वजनिक आरोग्य अध्यक्ष हरिष भांदिर्गे यांनी दिली आहे
महापौर रितू तावडे यांच्या दालनात भाजप मुंबई अध्यक्ष आमदार अमित साटम यांच्या उपस्थितीत आरोग्य दिनानिमित्त सार्वजनिक आरोग्य खात्याचा आढावा घेण्यात आला. यावेळीमहानगरपालिकेच्या आरोग्य सेवा सुविधा रुग्णालय इत्यादी बाबत सविस्तर चर्चा झाली. या बैठकीला आरोग्य समिती अध्यक्ष हरिष भांदिर्गे यांच्यासह अतिरिक्त आयुक्त विपीन शर्मा, संचालक (आरोग्य ), तसेच इतर अधिकारी उपस्थित होते.
यावेळी झालेल्या चर्चेत, महानगरपालिकेच्या आरोग्य विभागा मार्फत तसेच रुग्णालयामार्फत खरेदी करावयाची साधने, संसाधने, औषधे इत्यादी सर्व प्रकारची खरेदी ही यापुढे भारत सरकार पुरस्कृत जेम पोर्टल मार्फत करावी असा निर्णय घेण्यात आला आहे, यामुळे महानगरपालिकेचा आरोग्य विभागातील कारभारामध्ये पारदर्शकता व सुसूत्रता येईल. या निर्णयामुळे सर्व वस्तूंची उपलब्धता लवकरात लवकर होऊन नागरिकांना याचा लाभ होईल असा विश्वास भांदिर्गे यांनी व्यक्त केला.
तसेच महानगरपालिकेच्या उपनगरीय रुग्णालयामध्ये २००० पेक्षा जास्त रुग्णशयाची वाढ ही विविध पुनर्विकास प्रकल्प व नव्याने येणारे रुग्णालय यामध्ये होणार आहे. ही रुग्णालये टप्प्याटप्प्याने कार्यान्वित करून नागरिकांना आरोग्य सेवा सुविधा उपलब्ध करून देण्यात येणार आहेत यामध्ये सर्व प्रकारच्या सर्वसाधारण, विशेष व अतिविशेष स्वरूपाच्या सेवेचा समावेश आहे. भारत सरकारच्या डिप्लोमॅट ऑफ नॅशनल बोर्ड अंतर्गत पदव्युत्तर अभ्यासक्रम राबवून ही उपनगरीय रुग्णालय दर्जेदार सेवा देण्यास सक्षम होणार आहेत , याशिवाय कार्डिओलॉजी नेफ्रॉलॉजी इत्यादी अतिविशेष स्वरूपाच्या सेवा उपनगरीय रुग्णालयात अंतिम टप्प्यात सुरू करण्याचा विचार असल्याची माहिती भांदिर्गे यांनी दिली. अशाप्रकारे महानगरपालिकेच्या आरोग्य सेवेमध्ये दर्जोन्नती होणार आहे
याशिवाय औषधांची उपलब्धता, सार्वजनिक खाजगी सहभाग धोरणाअंतर्गत येणाऱ्या सेवा सुविधा, इत्यादी बाबत आढावा घेऊन प्रशासनास निविदेतील अटी व शर्तीचे कठोर पालन करण्याबाबत योग्य ती कारवाई करावी व नागरिकांना सेवा या महानगरपालिकेने ठरवून दिलेल्या दरातच उपलब्ध व्हाव्यात अशाही सूचना करण्यात आल्याचे भांदिर्गे यांनी सांगितले.