मुंबई: गेल्या दोन दिवस शांत बसलेल्या सोन्याने आज पुन्हा एकदा जोरात गती पकडली असून सोन्याच्या दरात वाढ झाली आहे. भारतीय वायदा बाजारात (MCX) सोन्याच्या दरात तब्बल १ हजार ३३८ रुपयांची वाढ झाली असून, तो आता १,५२,७५६ रुपये प्रति १० ग्रॅमवर पोहोचला आहे. केवळ सोन्यानेच नाही, तर चांदीनेही आज मोठी भरारी घेत गुंतवणूकदारांना आश्चर्याचा धक्का दिला आहे.
जागतिक बाजारात जरी काही प्रमाणात घसरण दिसत असली, तरी भारतीय बाजारपेठेत चित्र पूर्णपणे वेगळं असल्याचे दिसत आहे. अमेरिकन डॉलरचा निर्देशांक वाढल्यामुळे आंतरराष्ट्रीय स्तरावर सोने खरेदी महागली आहे. चीन, सिंगापूर आणि दक्षिण कोरियामध्ये लूनर न्यू इयरच्या सुट्ट्यांमुळे व्यवहार थंडावले आहेत, ज्याचा परिणाम जागतिक व्यापारावर होत आहे. चांदीच्या किमतीत गेल्या तीन दिवसांत किलोमागे १५ हजारांची घसरण झाली होती, पण आज पुन्हा ४,६६६ रुपयांच्या वाढीसह चांदी २,३३,४४९ रुपयांवर व्यवहार करत आहे.
सोन्याचे दर
२४ कॅरेट: १,५५,५२१ रुपये
२२ कॅरेट: १,४२,५८२ रुपये
१८ कॅरेट: १,१६,६४० रुपये
शहरानुसार सोन्याचे दर
मुंबई- १,५४,१९०
दिल्ली- १,५४,३४०
पुणे / बेंगळुरू- १,५४,१९०
चांदीच्या बाबतीत आज चेन्नईने देशात बाजी मारली आहे. दिल्ली आणि मुंबईत चांदी २,५९,९०० रुपये प्रति किलोने विकली जात असताना, चेन्नईमध्ये हाच दर २,६४,९०० रुपयांपर्यंत पोहोचला आहे. तज्ज्ञांच्या मते, जोपर्यंत अमेरिकन फेडरल रिझर्व्हच्या बैठकीचा निकाल आणि महागाईची नवी आकडेवारी समोर येत नाही, तोपर्यंत बाजारात अशीच 'धडधड' सुरू राहील. त्यामुळे जर तुम्ही मोठ्या गुंतवणुकीचा विचार करत असाल, तर थोडे दिवस थांबून बाजाराचा कल पाहणं फायद्याचं ठरू शकतं.