मुंबई : मुलुंड पश्चिम येथे मेट्रो रेल्वेच्या कामात पुलावरील पॅरापेटचा एक भाग अचानक बाजूला होऊन चालत्या ऑटोरिक्षावर कोसळल्याने हा अपघात घडला आहे. या बांधकामात सुरक्षिततेच्या मानकांचा अवलंब करण्यात महानगर प्रदेश विकास प्राधिकरणाकडून काही त्रुटी राहिल्या आहेत का ? याची चौकशी केली जाणार असल्याचे महापौर रितू तावडे यांनी येथील पाहणीदरम्यान माध्यमांशी बोलतांना सांगितले. ही दुर्घटना दुर्दैवी असून याप्रकारच्या घटना भविष्यात घडू नये, यासाठी यापुढील काळात योग्य ती खबरदारी घ्यावी,असेही महापौरांनी यावेळी संबंधित प्राधिकरणाला निर्देश दिले आहेत.
मुलुंड (पश्चिम) च्या एलबीएस मार्गावरील जॉन्सन अँड जॉन्सन परिसराजवळ बांधकाम सुरू असलेल्या मेट्रो रेल्वेच्या पुलावारील पॅरापेट भिंतींचा एक भाग निखळून ऑटोरिक्षावर कोसळल्याने एका पुरुषाचा मृत्यू झाला आहे, तर तीन जण जखमी झाले आहेत. या घटनेनंतर अपघात स्थळाला नवनिर्वाचित महापौर रितू तावडे व उप महापौर संजय घाडी हे पोहोचले. यावेळी आमदार मिहिर कोटेचा यांच्यासह त्यानंतर नगरसेवक प्रकाश गंगाधरे, निल सौमय्या,दिपिका घागही उपस्थित होत्या. यावेळी त्यांनी अपघात स्थळाची पाहणी करून संबंधित प्राधिकरणाला निर्देश दिले. उपासनी रुग्णालयात जाऊन मृत पावलेल्या रामधान यादव यांच्या कुटुंबियांचे सांत्वन केले तसेच जखमी झालेल्या राजकुमार यादव, महेंद्र प्रताप यादव आणि दिपा रुहिया या रुग्णांची विचारपूसही केली .