अखेर भाजपचा गटनेता ठरला, गणेश खणकर यांची नियुक्ती

मुंबई: मुंबई महापालिकेत भाजपाच्या गटनेते पदी गणेश खणकर यांची नियुक्ती करण्यात आली आहे. खणकर हे प्रभाग ३ मधून निवडून आले आहेत. प्रहारने काही दिवसांपूर्वीच या संदर्भातले अचूक अंदाज वर्तवणारे वृत्त दिले होते आणि आता खणकर यांची गटेनेते पदी नियुक्ती पाहायला मिळत आहे.

गटनेते पदी गणेश खणकर यांची निवड

भाजप महापालिका गटनेते पदी गणेश खणकर यांची निवड झाली आहे. खणकर हे प्रभाग ३ मधून निवडून आले असून ते भाजपाचे प्रवक्ते आहेत. त्यांनी उबाठाचे सौरभ घोसाळकर यांचा पराभव केला आहे.



 

भाजपचे मुंबई अध्यक्ष अमित साटम यांनी नवनिर्वाचित गटनेते गणेश खणकर यांचे अभिनंदन केले आहे. मुंबई महापालिकेच्या निवडणुकीत भाजपाचे ८९ नगरसेवक निवडून आले आहेत. मुंबई महापालिकेतील भाजप हा मोठा पक्ष असल्याने या पक्षाच्या महापौर बनल्यास याच पक्षाचा गटनेता हा सभागृह नेता म्हणून निवडला जाऊ शकतो. त्यामुळे या सभागृह नेते पदासाठी माजी सभागृह नेते आणि भाजपचे ज्येष्ठ नगरसेवक प्रभाकर शिंदे यांचे नाव चर्चेत होते. मात्र, प्रभाकर शिंदे यांनी यापूर्वी सभागृह नेतेपद भूषवलेले असल्याने या पदावर पुन्हा त्यांची नेमणूक केली गेल्यास स्थायी समिती अध्यक्षपद कोणाला द्यावे यावरून पक्षाची मोठी अडचण झाली होती. ही बाब लक्षात घेऊन महापालिकेच्या सभागृह नेतेपदी भाजपचे प्रवक्ते आणि भाजपचे महामंत्री गणेश खणकर यांच्या नावाचा विचार केल्याची चर्चा आहे.