सराफा व्यापाऱ्यांना देतो व्याजाने कर्ज
इंदूर: इंदूरच्या सराफा बाजारात अनेक वर्षांपासून भीक मागणारा मांगीलाल प्रत्यक्षात कोट्यवधींच्या संपत्तीचा मालक निघाला. महिला व बाल विकास विभागाने भिक्षावृत्ती निर्मूलन अभियानांतर्गत त्याला रेस्क्यू केले त्यावेळेस हा खुलासा झाला. प्रशासनाने मांगीलालला उज्जैनच्या सेवाधाम आश्रमात पाठवले आहे. त्याच्या मालमत्तेची, बँक खात्याची चौकशी केली जात आहे. मांगीलालकडून पैसे उधार घेणाऱ्या सराफा व्यापाऱ्यांशीही बोलले जाईल.
मांगीलाल सराफाच्या गल्ल्यांमध्ये लाकडी घसरगाडी, पाठीवर बॅग आणि हातात चप्पल घेऊन लोकांची सहानुभूती मिळवत असे. तो कोणाकडेही थेट भीक मागत नसे, तर लोकांजवळ जाऊन उभा राही, त्यानंतर लोक स्वतःच त्याला पैसे देत असत. चौकशीत समोर आले की तो दररोज सुमारे ५०० ते १००० रुपयांपर्यंत कमाई करत होता.
चौकशीदरम्यान मांगीलालने कबूलही केले की, भीक मागून मिळालेल्या पैशांचा उपयोग तो सराफा परिसरातील काही व्यापाऱ्यांना व्याजाने कर्ज देण्यासाठी करत असे. तो एक दिवसासाठी आणि एका आठवड्यासाठी पैसे देत असे आणि दररोज व्याजाची वसुली करण्यासाठी सराफा परिसरात येत असे. बचाव पथकाचे नोडल अधिकारी दिनेश मिश्रा यांच्या माहितीनुसार, चौकशीत हे देखील समोर आले की मांगीलालकडे शहराच्या वेगवेगळ्या भागांत तीन पक्की घरे आहेत. भगतसिंग नगरमध्ये त्याच्या नावावर १६ बाय ४५ फूटचे तीन मजली घर आहे. शिवनगरमध्ये ६०० चौरस फुटांचे घर आणि अलवासमध्ये १० बाय २० फूटचे वन बीएचके घर आहे. एक घर सरकारने अपंगत्वाच्या आधारावर उपलब्ध करून दिले होते. या व्यतिरिक्त मांगीलालकडे तीन ऑटो आहेत, जे तो भाड्याने चालवतो आणि एक डिझायर कार देखील आहे, ती चालवण्यासाठी त्याने ड्रायव्हर ठेवला आहे. तो अलवास परिसरात आपल्या आई-वडिलांसोबत राहतो, तर त्याचे दोन भाऊ वेगळे राहतात.जिल्हा कार्यक्रम अधिकारी रजनीश सिन्हा यांनी पुष्टी केली की, भीक मागण्याला प्रोत्साहन दिल्याबद्दल मांगीलालवर कारवाई केली जाईल. तो सावकारीमध्येही सामील आहे, जो एक गुन्हा आहे. याचे ठोस पुरावे मिळाल्यास त्याच्यावर कारवाई केली जाईल.
इंदूरमध्ये फेब्रुवारी २०२४ पासून भिक्षावृत्तीमुक्त अभियान राबवले जात आहे. प्राथमिक सर्वेक्षणात ६५०० भिकारी समोर आले होते, त्यापैकी ४५०० जणांचे समुपदेशन करून त्यांची भिक्षावृत्ती सोडवण्यात आली आहे. तर १६०० भिकाऱ्यांना वाचवून उज्जैन येथील सेवाधाम आश्रमात पाठवण्यात आले आहे आणि १७२ मुलांचे शाळांमध्ये प्रवेश करण्यात आले आहेत. प्रशासनाने स्पष्ट केले आहे की, भिक्षावृत्ती करणाऱ्यांसोबतच तिला प्रोत्साहन देणाऱ्यांविरुद्धही पुढे कठोर कारवाई सुरू राहील.जिल्हाधिकारी शिवम वर्मा म्हणाले की, या प्रकरणात दंडात्मक कारवाई केली जाईल. इंदूर भिक्षुकमुक्त शहर आहे आणि शासनातर्फे भिक्षुकांच्या पुनर्वसनाची व्यवस्था केली जात आहे, जेणेकरून त्यांना कोणत्याही प्रकारची गैरसोय होऊ नये. चौकशीदरम्यान सर्व तथ्ये पाहिली जातील आणि त्याच आधारावर कारवाई केली जाईल. त्यांनी सामान्य नागरिकांना आवाहन केले की, भिक्षावृत्तीपासून दूर राहावे. जिल्हा प्रशासन पूर्णपणे सहकार्य करेल, परंतु भिक्षा घेणे आणि देणे दोन्हीही गुन्हा आहेत.