मुंबई : मुंबईकरांची जीवनवाहिनी असलेल्या मुंबई लोकलच्या प्रवाशांसाठी एक अत्यंत महत्त्वाची बातमी समोर येत आहे. मध्य रेल्वेच्या मुंबई विभागाने उपनगरीय नेटवर्कवर आवश्यक अभियांत्रिकी, देखभाल आणि सुरक्षा कामे करण्यासाठी आज, रविवार, ३० नोव्हेंबर रोजी मेगाब्लॉक (Mega Block) जाहीर केला आहे. मध्य रेल्वेने मुख्य मार्ग (Main Line) आणि हार्बर मार्गावर (Harbour Line) प्रत्येकी पाच-पाच तासांचा मेगाब्लॉक घेतला आहे. या तांत्रिक कामांमुळे आज लोकल सेवा मोठ्या प्रमाणावर विस्कळीत होणार आहे, ज्यामुळे प्रवाशांना काही प्रमाणात गैरसोयीचा सामना करावा लागू शकतो. लोकल सेवा प्रभावित होणार असल्याने, रेल्वे प्रशासनाने मुंबई लोकलच्या प्रवाशांना आपल्या प्रवासाचे नियोजन काळजीपूर्वक करण्याची सूचना केली आहे. मेगाब्लॉकमुळे होणारा विलंब लक्षात घेऊनच घराबाहेर पडावे, असे आवाहन प्रशासनाने केले आहे.
पनवेल ते वाशी दरम्यान ५ तासांचा ब्लॉक; CSMT-पनवेल लोकल फेऱ्या रद्द
आज, रविवार (३० नोव्हेंबर) रोजी मध्य रेल्वेच्या मुख्य मार्गासोबतच हार्बर रेल्वे मार्गावर (Harbour Line) देखील तांत्रिक कामासाठी पाच तासांचा मेगाब्लॉक हा मेगाब्लॉक सकाळी ११:०५ ते दुपारी ०४:०५ वाजेपर्यंत पनवेल ते वाशी या विभागादरम्यान असणार आहे. या ब्लॉकमुळे सीएसएमटी (CSMT) ते पनवेल/बेलापूर दरम्यान धावणाऱ्या अप आणि डाऊन लोकल फेऱ्या रद्द राहणार आहेत. हार्बर मार्गावरील प्रवाशांची गैरसोय टाळण्यासाठी रेल्वे प्रशासनाने एक दिलासादायक व्यवस्था केली आहे. सीएसएमटी ते वाशी दरम्यान विशेष अप आणि डाउन लोकल फेऱ्या चालवण्याची व्यवस्था करण्यात आली आहे. प्रवाशांसाठी दिलासा देणारी बाब म्हणजे उरण मार्गिकेवरील (पोर्ट लाईनवरील) लोकल सेवा या मेगाब्लॉकच्या काळात नेहमीप्रमाणे सुरू राहणार आहेत, त्यामुळे या मार्गावरील प्रवाशांना कोणताही मोठा अडथळा येणार नाही. रेल्वे प्रशासनाने प्रवाशांना सहकार्य करण्याचे आवाहन केले आहे.
बारामती : राज्यातील नगरपरिषद आणि नगरपंचायत निवडणुकांच्या प्रचाराची रणधुमाळी आता अंतिम टप्प्यात पोहोचली आहे. आज, रविवार (दि. ३० नोव्हेंबर) रोजी ...
ट्रान्स-हार्बर मार्गावरही मेगाब्लॉक
मध्य रेल्वेने आज, रविवार (३० नोव्हेंबर) रोजी मुंबईतील तिन्ही उपनगरीय मार्गांवर तांत्रिक कामांसाठी मेगाब्लॉक जाहीर केला आहे. मुख्य आणि हार्बर मार्गासोबतच ट्रान्स-हार्बर मार्गावरही (Trans-Harbour Line) लोकल सेवा प्रभावित होणार आहे. ट्रान्स-हार्बर मार्गावरील ब्लॉकची वेळ दोन्ही लाईनसाठी वेगवेगळी आहे, अप लाईन (Up Line): सकाळी ११:०२ ते दुपारी ०३:५३ पर्यंत. डाऊन लाईन (Down Line): सकाळी १०:०१ ते दुपारी ०३:२० पर्यंत. या ब्लॉकच्या वेळेत ठाणे ते पनवेल दरम्यान धावणाऱ्या काही लोकल फेऱ्या रद्द करण्यात येतील. मात्र, प्रवाशांना मोठा दिलासा देण्यासाठी रेल्वे प्रशासनाने ठाणे ते वाशी/नेरुळ दरम्यान लोकल सेवा उपलब्ध ठेवली आहे. यामुळे ट्रान्स-हार्बर मार्गावरील अत्यावश्यक प्रवासावर मोठा परिणाम होणार नाही. हार्बर मार्गाप्रमाणेच, ट्रान्स-हार्बर मार्गावरील प्रवाशांसाठी पोर्ट मार्ग (उरणकडे जाणारा मार्ग) या ब्लॉक काळात नेहमीप्रमाणे उपलब्ध असेल. प्रवाशांनी प्रवासापूर्वी वेळापत्रक तपासून सहकार्य करण्याचे आवाहन रेल्वे प्रशासनाने केले आहे.
नाईट ब्लॉकमुळे रविवारी प्रवास सुलभ
पश्चिम रेल्वेने उपनगरीय नेटवर्कवर देखभालीची कामे करण्यासाठी शनिवारी मध्यरात्री १२:१५ ते रविवारी पहाटे ०४:१५ या वेळेत मुंबई सेंट्रल ते माहीम दरम्यान जलद अप आणि डाउन मार्गावर हा ब्लॉक घेतला होता. यामुळे, दिवसा पश्चिम रेल्वे मार्गांवर प्रवास करणाऱ्या प्रवाशांना कोणताही अडथळा येणार नाही. या 'नाईट ब्लॉक'च्या वेळेत, जलद मार्गावरील अप आणि डाउन लोकल सांताक्रूझ ते चर्चगेटदरम्यान धीम्या मार्गावर वळवण्यात आल्या होत्या. परिणामी, रात्री उशिराच्या काही फेऱ्या रद्द झाल्या किंवा विलंबाने धावल्या, अशी माहिती रेल्वे प्रशासनाने दिली आहे. हा ब्लॉक दिवसा न घेता रात्रीच्या वेळी घेतल्याने लाखो मुंबईकरांचा रविवारचा प्रवास सुकर होणार आहे.