संरक्षण मंत्र्यांचे नाव न घेता चीन व पाकला इशारा
नवी दिल्ली : भारत शांतता, संवाद आणि जागतिक स्थैर्यावर विश्वास ठेवतो; पण देशाच्या सार्वभौमत्वाच्या आणि राष्ट्रीय सुरक्षेच्या बाबतीत कोणतीही तडजोड मान्य करणार नाही, असा ठाम संदेश संरक्षणमंत्री राजनाथ सिंह यांनी दिला. चाणक्य संरक्षण संवाद या कार्यक्रमात ते बोलत होते. त्यांनी पाकिस्तान आणि चीनची थेट नावे न घेतल्यानेही त्यांच्याकडेच हा इशारा असल्याचे स्पष्ट दिसून आले.
संरक्षणमंत्री सिंह म्हणाले की, बदलत्या जागतिक वातावरणात भारत आता संतुलनाचा व जबाबदारीचा आवाज म्हणून उदयास येत आहे. इंडो-पॅसिफिक प्रदेशातील देश तसेच जागतिक दक्षिणमधील राष्ट्रे भारताला सर्वाधिक विश्वासार्ह भागीदार समजतात. आर्थिक प्रगती, विज्ञान-तंत्रज्ञानातील क्षमता आणि तत्त्वनिष्ठ परराष्ट्र धोरण यामुळे भारताचे स्थान जागतिक पातळीवर अधिक मजबूत झाले असल्याचेही त्यांनी नमूद केले.
दहशतवाद, सीमापार अतिरेकी कारवाया, समुद्री मार्गांवरील दबाव, माहिती युद्ध आणि भू-राजकीय तणाव यांसारखी अनेक आव्हाने भारतासमोर असल्याचे ते म्हणाले. या अनिश्चिततेला सामोरे जाण्यासाठी सतत सज्ज राहणे आवश्यक आहे आणि म्हणूनच लष्करी सुधारणा हा पर्याय नाही, तर अनिवार्य धोरणात्मक निर्णय आहे, असे त्यांनी स्पष्ट केले.
भारतात सध्या संरक्षण क्षेत्रात मोठे आधुनिकीकरण सुरू आहे. नवी प्लॅटफॉर्म्स, अत्याधुनिक तंत्रज्ञान, स्थानिक उत्पादनाला प्रोत्साहन आणि खरेदी प्रक्रियेत पारदर्शकता याकडे सरकारचा भर असल्याचे सिंह यांनी सांगितले. आत्मनिर्भर भारत मोहिमेमुळे संरक्षण औद्योगिक क्षेत्र मजबूत होत असून, परदेशी साधनसंपत्तीवरील अवलंबित्व कमी होत आहे, असेही त्यांनी
निदर्शनास आणले.
सशस्त्र दलांना देशाच्या सुरक्षिततेचे भक्कम आधारस्तंभ म्हणताना, सीमांचे रक्षण, आपत्ती व्यवस्थापन, सागरी सुरक्षेतील सहभाग आणि आंतरराष्ट्रीय शांतता मोहिमांमधील योगदान याबद्दल त्यांनी गौरव व्यक्त केला. भारतीय जवानांची तयारी आणि शौर्यामुळेच भारत आपल्या शेजारील व जागतिक आव्हानांना समर्थपणे सामोरे जाऊ शकतो, यावर त्यांनी भर दिला.
भविष्यातील युद्धांमध्ये कृत्रिम बुद्धिमत्ता व अत्याधुनिक तंत्रज्ञान महत्त्वाची भूमिका बजावणार असल्याने या क्षेत्रातही मोठी गुंतवणूक केली जात असल्याचे त्यांनी सांगितले. या कार्यक्रमात त्यांनी लष्करासाठी एआय-संबंधित नवे प्रकल्प आणि लष्करी हवामान अंदाज प्रणालीचे लोकार्पणही केले.
भारत कोणाच्याही विरोधात नाही; पण देशाच्या सार्वभौमत्वाचा अपमान किंवा सुरक्षेला धोका निर्माण झाल्यास कठोर भूमिका घेण्याची भारताची तयारी कायम आहे, हे सिंह यांनी स्पष्टपणे सांगितले. शांतता हा भारताचा मार्ग असला तरी राष्ट्रहित सर्वोच्च आहे, हे त्यांचे वक्तव्य पुन्हा अधोरेखित करते.