देवगड : महाराष्ट्राच्या सागरी हद्दीत अनधिकृत मासेमारी करणाऱ्या परप्रांतीय नौकेवर मत्स्यव्यवसाय विभागाने कठोर कारवाई करीत नौका जप्त केली आहे. ही कारवाई महाराष्ट्र सागरी मासेमारी नियमन अधिनियम १९८१ तथा सुधारणा अधिनियम २०२१ च्या तरतुदींनुसार करण्यात आली आहे.
देवगडसमोर सुमारे १० वाव अंतरावर नियमित गस्तीदरम्यान ८ नोव्हेंबर २०२५ रोजी रात्री १०.४५ वाजता महाराष्ट्राच्या सागरी हद्दीत अनधिकृत मासेमारी करणारी नौका आढळली. चौकशी करुन घुसखोरी करणारी नौका जप्त करण्यात आली. ही कारवाई मत्स्य विकास विभागाचे अंमलबजावणी अधिकारी किरण वाघमारे यांनी केली.
कर्नाटक राज्याच्या जलक्षेत्रासाठी परवाना असलेली नौका “भारद्वाजा” (नोंदणी क्र. IND-KA-02-MM-4171) ही श्री. अशोक गोपाल सालिन (रा. मल्लपी, पो. कोडूवूर, उडुपी, कर्नाटक) यांच्या मालकीची असून, ही नौका महाराष्ट्राच्या जलक्षेत्रात अनधिकृतपणे मासेमारी करताना आढळली. या नौकेवर नौका तांडेलसह इतर खलाशी उपस्थित होते. नौका ताब्यात घेऊन ती देवगड बंदरात सुरक्षित ठेवण्यात आली आहे. नौकेवर आढळलेल्या मासळीचा लिलाव प्रक्रिया सुरू असून, याबाबतचा अहवाल सहाय्यक आयुक्त मत्स्यव्यवसाय, सिंधुदुर्ग यांच्या न्यायालयात सादर करण्यात येणार आहे. सुनावणीअंती नौकेच्या मालकांवर कायदेशीर कारवाई करण्यात येईल.