नवी मुंबई (प्रतिनिधी) : खासगीकरण आणि फेररचनेच्या मुद्द्यांवर संयुक्त कृती समितीने आंदोलन पुकारले आहे. या आंदोलनास महावितरणमधील २३ पैकी ७ वीज कर्मचारी संघटनांनी पाठिंबा दिला आहे. आजपासून (ता. ९) ११ ऑक्टोबरदरम्यान राज्यव्यापी संप आहे. नवी मुंबईतील सुमारे ८० टक्के कर्मचारी संपात सहभागी झाले असून, शहरातील वीजपुरवठ्यावर परिणाम होऊ शकतो.
राज्य शासनाने वीज सेवा अत्यावश्यक असल्याने मेस्मा लागू केला आहे. त्यामुळे या सात संघटनांचा संप बेकायदेशीर ठरला आहे. कृती समितीकडून संप मागे घेण्यास नकार दिला आहे. संपात सहभागी झालेल्या कर्मचाऱ्यांविरोधात कारवाई तसेच ज्यांची सेवा १ वर्षांपेक्षा कमी आहे, नुकतीच भरती झालेल्यांची सेवा तत्काळ रद्द करण्यात येईल, असे महावितरणने स्पष्ट केले आहे.
