मुंबई : दहिसर (पूर्व) ते मीरा-भाईंदर दरम्यानच्या मुंबई मेट्रो मार्ग क्रमांक ९ प्रकल्पाने एक महत्त्वपूर्ण टप्पा गाठला आहे. भायंदर पश्चिम रस्ता उड्डाण पुलाजवळील वर्दळीच्या परिसरात ६५ मीटर लांबीचा मिश्र स्टील गर्डर यशस्वीरीत्या गुरुवारी रात्री प्रस्थापित करण्यात आला.
यामुळे मेट्रो ९ चा दहिसर (पूर्व) – काशिगाव पहिला टप्पा डिसेंबरमध्ये सेवेत येण्याचा अंदाज वर्तविण्यात येत आहे. एमएमआरडीएच्या ३३७.१० किलोमीटर लांबीच्या मेट्रो नेटवर्कचा एक महत्त्वाचा घटक असलेला मेट्रो मार्ग ९ हा दहिसर (पूर्व) ते मीरा-भाईंदर दरम्यान जोडणारा आहे.
सध्या या मार्गाचे काम प्रगतिपथावर आहे. या अंतर्गत, भायंदर पश्चिम रस्ता उड्डाण पुलाजवळील अत्यंत आव्हानात्मक आणि वर्दळीच्या परिसरात ६५ मीटर लांबीचा मिश्र स्टील गर्डर यशस्वीरीत्या प्रस्थापित करण्यात आला.