मुंबई : पश्चिम रेल्वेवर असलेल्या मुंबई सेंट्रल स्टेशनवर एका २७ वर्षीय प्रवाशाचा चुकीच्या बाजूला उतरण्याच्या प्रयत्नात मृत्यू झाला. गुरुवारी सकाळी पावणे दहाच्या सुमारास प्लॅटफॉर्म क्रमांक चारजवळ दुर्घटना घडली. राजेश ढिला असं मृत्यू झालेल्या तरुणाचं नाव आहे. तो ट्रेनमधून प्लॅटफॉर्मऐवजी दुसऱ्या बाजूला उतरण्याचा प्रयत्न करत होता.
याबाबत प्रत्यक्षदर्शींनी दिलेल्या माहितीनुसार, राजेशने ट्रेनमधून चुकीच्या बाजूला उडी मारली. त्या बाजूला लोखंडी सळ्यांच्या बॅरिकेड्सवर अडकला. त्याच्या गळ्यात लोखंडी सळई घुसल्यानं तो गंभीर जखमी झाला होता. काही मिनिटं तो तसाच लटकलेल्या अवस्थेत होता. घटनेची माहिती मिळताच घटनास्थळी रुग्णवाहिका बोलावण्यात आली.
सव्वा दहाच्या सुमारास रुग्णवाहिकेतून त्याला नेण्यात आले. मात्र घटनास्थळीच त्याचा मृत्यू झाल्याची माहिती डॉक्टरांनी दिली. त्याचा मृतदेह नायर रुग्णालयात नेण्यात आला असून शवविच्छेदनानंतर कुटुंबियांकडे सोपवला जाईल.