नागरिकांनी वेळापत्रक पाहूनच घराबाहेर पडा, प्रशासनाचे आवाहन
मुंबई : मुंबईकरांची लाईफलाईन मानली जाणाऱ्या रेल्वेबाबत (Mumbai Railway) एक महत्त्वाची बातमी समोर येत आहे. मध्य रेल्वेच्या (Central Railway) मुंबई विभागाच्या वतीने उद्या विविध अभियांत्रिकी आणि देखभालीची कामे करण्यासाठी तिन्ही रेल्वे मार्गांवर मेगाब्लॉक (Mega Block) घेण्यात येणार आहे. या दरम्यान काही लोकल गाड्या रद्द करण्यात येणार असून काही विलंबाने धावणार आहेत. प्रवाशांचा खोळंबा होऊ नये यासाठी प्रवाशांनी लोकलचा प्रवास करण्यापूर्वी वेळापत्रक पाहूनच घराबाहेर पडावे, असे आवाहन रेल्वे प्रशासनाकडून करण्यात आले आहे.
असे असेल वेळापत्रक
मध्य रेल्वे (Central Mega Block)
- कुठे - माटुंगा ते मुलुंड अप - डाऊन धीम्या मार्गावर
- कधी - सकाळी ११ वाजून ०५ मिनिटं ते दुपारी ३ वाजून ५५ मिनिटांपर्यंत
- परिणाम - या ब्लॉकदरम्यान छत्रपती शिवाजी महाराज टर्मिनस येथून सुटणाऱ्या डाऊन मार्गावरील धीम्या लोकल सेवा माटुंगा आणि मुलुंड स्थानकांदरम्यान डाऊन जलद मार्गावर वळवण्यात येईल. ठाणे येथून सुटणाऱ्या अप धीम्या मार्गावरील सेवा मुलुंड आणि माटुंगा स्थानकांदरम्यान अप जलद मार्गावर वळवण्यात येईल.
हार्बर रेल्वे (Harbour Mega Block)
- कुठे - वडाळा रोड-मानखुर्द अप आणि डाऊन मार्गावर
- कधी - सकाळी ११ ते ४ वाजेपर्यंत
- परिणाम - ब्लॉक कालावधीत छत्रपती शिवाजी महाराज टर्मिनस/ वडाळा येथून वाशी/बेलापूर/पनवेल याकरिता सुटणारी डाऊन हार्बर मार्गावरील सेवा आणि पनवेल / बेलापूर/वाशी येथून छत्रपती शिवाजी महाराज टर्मिनस याकरिता सुटणारी अप हार्बर मार्गावरील सेवा बंद राहतील. तथापि, ब्लॉक कालावधीत पनवेल ते मानखुर्द दरम्यान विशेष सेवा चालवल्या जातील.
पश्चिम रेल्वे (Western Mega Block)
- कुठे - वसई रोड ते भाईंदर अप- डाऊन धीम्या मार्गावर
- कधी - शनिवारी - रविवारी रात्री १२ वाजून ३० मिनिटं ते पहाटे ४ वाजेपर्यंत
- परिणाम - या ब्लॉकदरम्यान अप-डाऊन धीम्या मार्गावरील लोकल सेवा विरार/वसई रोड ते बोरिवली / गोरेगाव रेल्वे स्थानकादरम्यान जलद मार्गावर वळविण्यात येणार आहे. या ब्लॉकमुळे अप आणि डाऊन उपनगरीय सेवा रद्द राहतील.