सरफिराचं प्रोमोशन आणि अनंत-राधिकाच्या विवाहसोहळ्याला राहणार अनुपस्थित
मुंबई : बॉलिवूडचा खिलाडी अक्षय कुमारचा (Akshay Kumar) 'सरफिरा' (Sarfira) हा आगामी चित्रपट सध्या चांगलाच चर्चेत आहे. मात्र, याच चित्रपटाच्या प्रोमोशनदरम्यान अक्षयच्या चाहत्यांसाठी एक धक्कादायक बातमी समोर आली आहे. आज सकाळी केलेल्या चाचणीदरम्यान अक्षय कोव्हिड पॉझिटिव्ह (Covid Positive) असल्याचे समजले आहे. त्यामुळे आता सरफिराच्या प्रोमोशनमध्ये अक्षय सहभाग घेऊ शकणार नाही. तसेच आज होणाऱ्या अनंत-राधिकाच्या विवाहसोहळ्यालाही (Anant-Radhika Wedding) अक्षय कुमार उपस्थित राहू शकणार नाही.
मिळालेल्या माहितीनुसार, 'सरफिरा' या चित्रपटाच्या प्रोमोशनदरम्यान त्याला कोरोनाची लागण झाली आहे. अक्षय कुमारचा कोरोना रिपोर्ट पॉझिटिव्ह आला असून त्याने स्वतःला विलगीकरणात ठेवले आहे. प्रोमोशनच्या वेळी त्याला अस्वस्थ वाटू लागले होते. त्यादरम्यान प्रोमोशन करणाऱ्या टीमचे काही क्रू सदस्य कोविड पॉझिटिव्ह आढळल्याची बाब त्याला समजली. त्यानंतर त्याने कोविड चाचणी केली आणि आज सकाळी त्याची चाचणी पॉझिटिव्ह आली.
कोरोना चाचणी पॉझिटीव्ह आल्यानंतर आता अक्षय कुमार 'सरफिरा' चित्रपटाचे कोणतेही प्रमोशन करणार नाही. त्याने स्वत: ला आयसोलेशनमध्ये ठेवले आहे. डॉक्टरांच्या सल्ल्यानुसार, औषधोपचार सुरू असून अक्षय कुमार क्वारंटाईन आहे. तो चित्रपट आजच चित्रपटगृहांमध्ये प्रदर्शित झाला आहे.
अनंत-राधिकाच्या विवाहसोहळ्याला राहणार अनुपस्थित
अनंत अंबानी आणि राधिका मर्चंटचा बीकेसी जिओ वर्ल्ड सेंटर येथे शाही विवाह सोहळा आयोजित करण्यात आला आहे. बॉलिवूडसह अनेक हॉलिवूड सेलिब्रिटी या सोहळ्याला हजेरी लावणार आहेत. मात्र, कोरोना पॉझिटिव्ह आल्यामुळे अक्षय कुमार या सोहळ्याला उपस्थित राहू शकणार नाही.