Mumbai Goa Highway accident : भीषण अपघात! गाडीवरील ताबा सुटला आणि शेड व रॅम्प झाले जमीनदोस्त!

दोन युवती गंभीर जखमी

नांदगाव : मुंबई गोवा महामार्गावर (Mumbai Goa Highway) नांदगाव दत्तमंदिर येथे चारचाकी मारुती स्विफ्ट कार (Maruti Swift car) चालकाचा गाडीवरील ताबा सुटल्याने गाडीने प्रवासी निवारा शेड, रॅम्प जमीनदोस्त करून टाकली. यामध्ये शेडमधील दोन महाविद्यालयीन युवती जखमी झाल्या. एका युवतीचे दोन्ही पाय जायबंदी होऊन गंभीर दुखापत झाली. ही घटना सकाळी ८:३० च्या सुमारास घडली.

याबाबत अधिक माहिती अशी की, रत्नागिरीहून गोव्याकडे जाणारा चारचाकी चालक निनाद सुभाष शिरदनकर (रत्नागिरी) नांदगाव दत्तमंदिर पाटील वाडी जवळ आला असता वाहनावरील ताबा सुटला आणि भयंकर वेगाने लगतच्या निवारा शेडला धडक देऊन त्यापुढील लोखंडी रॅम्प तोडून रस्त्यावर पलटी झाला.

यावेळी शेडमध्ये दोन महाविद्यालयीन युवती कणकवली येथे महाविद्यालयात जाण्यासाठी थांबल्या होत्या.या अपघातात प्रेरणा राजेंद्र तांबे (वय १८ वर्षे) गंभीर जखमी असून तिचे दोन्ही पाय जायबंदी असल्याचे सांगितले गेले. तिला उपचारासाठी कणकवली येथील खाजगी रुग्णालयात दाखल करण्यात आले. तर दुसरी युवती व चालक किरकोळ जखमी झाले. अधिक तपास कणकवली पोलीस करत असून पोलिस चंद्रकांत माने घटनास्थळी तातडीने दाखल झाले होते.