कर्मचार्यांची उडाली धांदल
मुंबई : मुंबईतील दादरमधील शिवाजी पार्क (Dadar Shivaji Park) ही अत्यंत गजबजाटीची जागा आहे. अनेक लोक या ठिकाणी दररोज भेट देत असतात. विविध क्रीडा प्रकारांचे प्रशिक्षण वर्ग येथे चालवले जातात. तसेच लहान मुलांसाठीही अनेक प्रशिक्षण वर्ग, व्यायामशाळा या ठिकाणी आहेत. त्यामुळे दररोजच पालक आणि लहान मुलांची या ठिकाणी गर्दी होत असते. मात्र, या गर्दीच्या ठिकाणी एक धक्कादायक बाब समोर आल्याने सर्वांचीच धांदल उडाली. शिवाजी पार्क येथील महात्मा गांधी जलतरण तलावात (Mahatma Gandhi Swimming pool) तब्बल २ ते ३ फूट लांबीची मगर (Crocodile) आढळून आली. यामुळे कर्मचार्यांसोबत सर्वच घाबरले. सध्या मगरीला पकडून तलावाच्या बाहेर काढण्यात आले आहे.
आज सकाळच्या सुमारास तलावाचे इन्स्पेक्शन करत असताना तलावात मगर असल्याचे कर्मचार्याच्या लक्षात आले. त्याने लगेच काही जणांच्या साथीने तिला पकडून ड्रममध्ये ठेवलं. या दरम्यान मगरीने एका कर्मचार्याला काही प्रमाणात जखमीही केलं. बाजूलाच असलेल्या प्राणिसंग्रहालयातून ही मगर आली असावी असा अंदाज कर्मचार्यांनी व्यक्त केला आहे. याआधी देखील अजगर आणि साप याच प्राणिसंग्रहालयातून सुटून बाहेर पडल्याने लोकांमध्ये घबराहट निर्माण झाली होती. शिवाय दोन महिन्यांपूर्वी याच स्विमिंग पूलमध्ये सापदेखील सापडला होता. त्यामुळे कोणाला दुखापत झाली तर त्याची जबाबदारी कोण घेणार, असा प्रश्न या ठिकाणी येणार्या नागरिकांकडून विचारला जात आहे.
मार्च एलिगेटर (March alligator) या जातकुळीतील ही मगर असल्याचं सांगण्यात आलेलं आहे. तलावात आढळून येणार्या मगरींइतकीच ही मगरदेखील घातक असते. शिवाजी पार्कमधील या स्विमिंग पूलमध्ये सकाळच्या सुमारासच लोक पोहण्यासाठी येत असतात. मात्र त्यापूर्वीच ही मगर सापडल्यामुळे लोकांनी सुटकेचा निश्वास सोडला आहे.
मनसेची प्राणिसंग्रहालयावर कारवाईची मागणी
मनसेचे संदीप देशपांडे यांनी सांगितले की, स्विमिंग पूलला लागूनच एक अनधिकृत प्राणिसंग्रहालय आहे ज्यात साप, मगर यांसारखे प्राणी अत्यंत दुरावस्थेत ठेवलेले आहेत. ते मोकाट फिरत असतात. त्यामुळे माणसांच्या जीवाला तर धोका आहेच पण त्या मुक्या प्राण्यांच्या जीवालाही धोका आहे. त्यामुळे आमची अशी मागणी आहे की, झू ऑथोरिटीने यावं आणि हे सगळे प्राणी ताब्यात घ्यावेत आणि त्यांची व्यवस्थित काळजी, निगा घ्यावी.