काय आहे हत्येमागचं कारण?
मुंबई : मुंबईतील (Mumbai) पवई भागातील मरोळ येथे भाड्याने एका फ्लॅटमध्ये आपल्या मित्रांसमवेत राहणार्या रुपल ओगरे (Rupal Ogrey) या २३ वर्षीय एअर हॉस्टेसची (Air Hostess) हत्या झाल्याची खळबळजनक बातमी काल समोर आली होती. या तरुणीचा मृतदेह राहत्या घरात गळा चिरलेल्या अवस्थेत सापडला होता. यातील संशयित असलेल्या इमारतीच्या सफाई कामगाराला काल पवई पोलिसांनी अटक केली होती. आता या प्रकरणाचा उलगडा झाला असून सफाई कामगारानेच ही हत्या केल्याचे तपासातून सिद्ध झाले आहे.
पोलिसांनी दिलेल्या माहितीनुसार, रविवारी रुपल एकटीच घरात होती. यावेळी तिने इमारतीत सफाईचं काम करणाऱ्या विक्रम आटवाल याला क्लिनिंगसाठी घरी बोलावले होते. ती एकटी असल्याचा फायदा घेत आरोपी तिच्याकडे शरीरसुखाची मागणी करु लागला, त्याने तिच्यावर जबरदस्तीने लैंगिक अत्याचार करण्याचा प्रयत्न केला. मात्र रुपलने विरोध केल्यानंतर आटवालने चाकूने तिच्यावर वार करत तिची हत्या केली.
पोलिसांनी या प्रकरणी इमारतीचे सर्व सीसीटीव्ही तपासण्यास सुरुवात केली होती. यावेळी आरोपी इमारतीत सकाळी ११.३० वाजता गेला आणि त्यानंतर दुपारी खूप वेळानंतर बाहेर पडल्याचे दिसले. शिवाय आत शिरताना त्याने गणवेश घातला होता मात्र बाहेर पडताना तो वेगळ्याच कपड्यांत होता. त्यामुळे पोलिसांचा त्याच्यावरील संशय खरा ठरला. गुन्हा केल्यानंतर आरोपीने त्याच्या गणवेशातील रक्ताचे डाग धुतले. कपडे बदलले आणि इमारतीतून बाहेर पडला, हे पोलीस तपासात उघड झालं आहे. या घटनेने परिसरात खळबळ उडाली आहे.