कोल्हापूरमार्गे जाणाऱ्यांसाठी टोलमाफी
मुंबई : कोकणातला गणेशोत्सव (Konkan Ganeshotsav) म्हटलं की चाकरमान्यांच्या अंगात एक वेगळाच उत्साह संचारतो. पटापटा रजा टाकून गावच्या बॅगा भरल्या जातात. पण गावी जाण्यासाठी रेल्वेचे किंवा एसटीचेही तिकीट मिळणे मुश्किल होऊन जाते. बुकिंग सुरु होताच दोन ते तीन दिवसांत फुल्ल होऊन जाते. त्याच पार्श्वभूमीवर गणोशोत्सवासाठी मुंबईहून (Mumbai) कोकणात (Kokan) जाणाऱ्या चाकरमान्यांसाठी शिवसेनेकडून मोफत एसटी (ST) प्रवास उपलब्ध करुन देण्यात येणार आहे. तसेच कोल्हापूर मार्गे कोकणात जाणाऱ्यांसाठी टोलमाफी करण्याचा निर्णय मुख्यमंत्री एकनाथ शिंदे (Eknath Shinde) यांनी घेतला आहे.
मुख्यमंत्री एकनाथ शिंदे यांच्या उपस्थितीत वर्षा निवासस्थानी काल शनिवारी एक बैठक पार पडली. यात मोफत एसटीचा व टोलमाफीचा निर्णय घेण्यात आला. मुंबईतील प्रत्येक विधानसभेतून १२ ते १८ मोफत बसेस सोडण्यात येणार आहेत. तसेच दरवर्षी मुंबई गोवा महामार्गावर होणारी वाहतूक कोंडी टाळण्यासाठी टोलमाफीचा निर्णय घेण्यात आला आहे. कोल्हापूर मार्गे गेल्यास मुंबई पुणे एक्सप्रेस हायवे आणि इतर टोल नाक्यांवरील ६०० ते ७०० रुपयांचा टोल माफ होणार आहे. यासाठी मुंबई शहरासोबत पालघर येथील नागरिकांना जवळच्या पोलीस स्थानकातून आरटीओकडून पास उपलब्ध करुन देण्यात येणार आहेत.
वर्षा निवासस्थानी पार पडलेल्या या बैठकीला मुंबई शहराचे पालकमंत्री दीपक केसरकर, श्रीकांत शिंदे हे देखील उपस्थित होते. या नेत्यांसोबतच पक्षाचे इतर पदाधिकारी देखील या बैठकीला उपस्थित होते. दरम्यान, यामध्ये अद्याप ऑनलाईन बुकिंवर कोणताही निर्णय घेण्यात आला नाही. त्यामुळे सुरुवातील कोणत्याही प्रकारचं ऑनलाईन बुकिंग नसणार आहे. तसेच या सुविधेसाठी मिळणारा प्रतिसाद पाहून ऑनलाईन बुकिंवर निर्णय घेण्यात येणार आहे.
निलेश राणे यांच्याकडूनही मोफत रेल्वे प्रवास
कोकणात जाण्यासाठी प्रत्येक चाकरमानी प्रचंड उत्सुक असतो. मात्र गाड्या उपलब्ध नसल्याने त्याचा नाईलाज होतो. अशा चाकरमान्यांना खुश करण्याचा प्रयत्न वेगवेगळ्या नेत्यांकडून वेगवेगळ्या स्तरांवर केला जातो. याआधी कुडाळ मालवण विधानसभेचे निवडणूक प्रमुख निलेश राणे यांनीही दादर ते कुडाळ मोफत रेल्वे प्रवास जाहीर केला. यालाही उत्तम प्रतिसाद मिळाला असून १६ सप्टेंबरला ही रेल्वे कोकणात रवाना होणार आहे.