मुरूड: रोहा, अलिबाग व मुरुड या तीन तालुक्याला जोडणारा साळाव पूलाच्या दुरुस्तीसाठी तीन दिवस सुरू असलेले लोड टेस्टिंगचे काम झाले असून जिल्हाधिकारी यांच्या आदेशानुसार उद्या सकाळी ६ वाजल्यापासून पाच टनाखालील वाहतूकीसाठी खुला करण्यात येत असल्याची माहिती सूत्रांनी दिली आहे.
साळाव पूलाच्या दुरुस्तीच्या कामासाठी ८ ते १० जून या काळात लोड टेस्टिंगसाठी पूल वाहतुकीसाठी बंद करण्यात आला होता, तर प्रवासी व नागरिकांना पायी चालत जाण्याची मुभा देण्यात आली होती. पुलावरून सर्व प्रकारची वाहतूक बंद करण्यात आल्याने याचा पर्यटन व्यवसाय व स्थानिक बाजार पेठेवर याचा परिणाम दिसून आला. उद्या सकाळ पासून हा पूल पाच टनाखालील वाहतुकीसाठी खुला करण्यात येणार असल्याने टू- व्हीलर, थ्री-व्हीलर व फोर-व्हीलर वाहन चालकांना पुलावरून ये-जा करण्याचा मार्ग खुला झाला आहे. अवजड वाहने, एसटी सेवाही लवकरच सुरू केली जावी, अशी अपेक्षा नागरिक व प्रवासी वर्गातून व्यक्त होत आहे.