विधानसभा पोटनिवडणूक आणि स्थानिक स्वराज्य संस्थांच्या निवडणुकांमध्ये भाजपची मुसंडी
रामपूर: कर्नाटकातील निवडणुकीच्या निकालामध्ये भाजपला हार पत्करावी लागली असली तरी सर्वात मोठे आणि राजकीय दृष्ट्या महत्वाचे राज्य उत्तर प्रदेशमध्ये भाजपाने सपा, काँग्रेसचा सुपडा साफ केला आहे. उत्तर प्रदेशमध्ये विधानसभा पोटनिवडणूक आणि स्थानिक स्वराज्य संस्थांच्या निवडणुकांमध्ये काँग्रेस, सपाला विधानसभा सीट, नगरपालिकांसह पंचायत समित्यादेखील गमवाव्या लागल्या आहेत.
सपाच्या आझम खान यांच्या रिक्त झालेल्या रामपूरमधील स्वार टांडा पोटनिवडणुकीतील सीटवर भाजपासोबत असलेल्या अपना दलाचे शफीक अंसारी जिंकले आहेत. सपाने ही जागा वाचविण्यासाठी हिंदू उमेदवार दिला होता. मात्र, अनुराधा चौहान यांचा ९ हजार ७३४ मतांनी पराभव झाला आहे. भाजपाने आझम खान यांची लोकसभेची रामपूर सीटही आपल्या ताब्यात घेतली होती. तसेच त्यानंतर विधानसभेची सीटही ताब्यात घेतली होती.
तर, दुसरीकडे नगर परिषद, नगर पालिका आणि नगर पंचायतीच्या महापौरपदाच्या, नगराध्यक्ष पदाच्या निवडणुकांतही भाजपाने सपा, काँग्रेसचा सुपडा साफ केला आहे. १७ पैकी १७ नगर परिषदांवर भाजपाचा विजय झाला आहे. तर १९९ नगर पालिकांपैकी भाजपाने ८८, सपाने ३५, काँग्रेस ५, बसपा २१ आणि इतर ५० जिंकल्या आहेत. तर ५४४ नगर पंचायतींपैकी भाजपाने आपल्याकडे १६९ पंचायतीवर विजय प्राप्त केला आहे. सपाने ७२, काँग्रेस ७, बसपा ३५ आणि इतर १५० जिंकल्या आहेत. त्यामुळे कर्नाटकात काँग्रेस जिंकली असली तरी उत्तरेत काँग्रेसचा सुपडा साफ झाला आहे.