पुणे: अभ्यास करताना मोबाइलमध्ये लक्ष असल्याने ओरडल्याबद्दल बारावीतील विद्यार्थ्यानेच आईचा जीव घेतल्याचा धक्कादायक प्रकार पुणे येथुन समोर आला आहे. याबाबत पोलीसांनीच लोणी काळभोर पोलीस ठाण्यात फिर्याद दिली आहे. ही घटना उरुळी कांचन येथील माऊली कृपा इमारतीत घडली.
याप्रकरणी लोणीकाळभोर पोलिसांनी जिशन जमीर शेख (वय १८) या मुलाला अटक केली आहे. तस्लीम जमीर शेख (वय ३७) असे मरण पावलेल्या महिलेचे नाव आहे. याबाबत पोलिसांकडून मिळालेल्या माहितीनुसार, तस्लीम शेख हिने गळफास घेऊन आत्महत्या केल्याची माहिती लोणी काळभोर पोलिसांना माहिती मिळाली होती. त्यानुसार पोलिसांनी शवविच्छेदनासाठी मृतदेह ससून रुग्णालयात पाठविला. त्यात गळा दाबून आणि डोक्याला जखम झाल्याने मृत्यू झाल्याचा प्राथमिक अहवाल डॉक्टरांनी दिला. याबाबत पुढील चौकशी केली असता सुरुवातीला कोणीच काही माहिती द्यायला तयार नव्हते पण नंतर मुलानेच त्याचा गुन्हा कबूल केला.
या घटनेचा घटनाक्रम असा की, जमीर शेख हे नमाज पठणासाठी गेले होते. त्यांची धाकटी मुलगी बाहेर गेली होती. मुलगा जिशान हा बारावीला आहे. तो अभ्यास करीत असताना मोबाइल पहात बसला होता. ते पाहून त्याची आई तस्लीम चिडली. ती जिशानला रागविली. त्याच्या गालावर चापट मारली. त्यामुळे जिशान याने आईला जोरात भिंतीवर ढकलले आणि तिचा गळा दाबला. त्यात तिचा मृत्यू झाला.
आई निपचित पडल्याचे पाहून जिशान घाबरला. त्याने ब्लेडने तिचे मनगट कापले. मात्र मृत्यू झाला असल्याने रक्त आले नाही. त्याने वायर पंख्याला अडकविली. फरशीवर आईचा मृतदेह ठेवला. काही वेळाने जमीर शेख आल्यावर आईने गळफास घेतला. मी तिला खाली उतरुन ठेवल्याचे सांगितले. त्यांनी तस्लीम यांना रुग्णालयात नेले. तेथील डॉक्टरांना संशय आल्याने त्यांनी ससून रुग्णालयात नेण्यास सांगितले. शवविच्छेदनात खुनाचा प्रकार समोर आला. याबाबत घरातील कोणीही फिर्याद देण्यास तयार नसल्याने पोलिसांच्यावतीने फिर्याद देण्यात आली असून मुलाला अटक करण्यात आली आहे. पोलीस अधिक तपास करीत आहेत़.