मुंबई: ठाकरे गटाचे राजापूरचे आमदार आणि उपनेते राजन साळवी यांचा पीए सुभाष मालप यांची लाचलूचपत प्रतिबंधक विभागामार्फत चौकशी सुरु झाली आहे. या चौकशीला पीए मालप यांच्यासोबत गेलेल्या आमदार राजन साळवी यांच्यावर मात्र, तोंडघशी पडण्याची वेळ आली.
राजन साळवी यांच्या पीएला रायगड लाचलूचपत प्रतिबंधक विभागाचाची नोटीस आली होती. २ फेब्रुवारीला होणाऱ्या चौकशीसाठी ते गैरहजर राहिल होते. आज त्यांनी लाचलूचपत प्रतिबंधक विभागाच्या कार्यालयात सकाळी ११ वाजता हजेरी लावली. त्यावेळी राजन साळवीही त्यांच्यासोबत उपस्थित होते. पण फक्त पीए सुभाष मालप यांनाच आत चौकशीसाठी बोलवण्यात आले.
राजन साळवी हे त्यांच्या मालमत्ता वाढीसंदर्भातील प्रकरणावरुन सध्या लाचलूचपत प्रतिबंधक विभागाच्या रडारवर आहेत. याआधीही राजन साळवींनी दोन वेळा लाचलूचपत विभागाच्या कार्यालयात मालमत्ते संदर्भात चौकशीसाठी हजेरी लावली होती.
यापूर्वी कोकणातील ठाकरे गटाचे आमदार वैभव नाईक यांना नोटीस बजावण्यात आलेली होती. त्यानंतर आता साळवी यांना नोटीस बजावण्यात आली असून, तेही आता चौकशीच्या फेऱ्यात आले आहेत.