एअर इंडियाच्या विमानात महिलेवर लघुशंका करणारा अटकेत

बंगळुरू : न्यूयॉर्कहून दिल्लीला जाणा-या एअर इंडियाच्या विमानात मद्यधुंद अवस्थेत लघुशंका करणा-या शंकर मिश्रा याला बंगळुरु पोलिसांनी अटक केली आहे.

शंकर मिश्राचा शोध घेण्यासाठी दिल्ली पोलीस लोकेशन ट्रेस करत होते. शंकर मिश्राचे शेवटचे लोकेशन बंगळुरुमध्ये सापडले होते. त्याच्या आधारे शंकर मिश्राचा शोध घेण्यात आला. मात्र, मिश्रा त्याचा फोन सातत्याने बंद करत होता. त्यामुळे त्याला शोधण्यात अनेक अडचणी आल्या. अखेर त्याला अटक करण्यात बंगळुरु पोलिसांना यश आले आहे.

२६ नोव्हेंबर २०२२ रोजी एअर इंडियाच्या विमानात आपल्या सहप्रवाशी महिलेवर मद्यधुंद अवस्थेत असलेल्या शंकर मिश्रा याने लघवी केली होती. या घटनेनंतर एकच खळबळ उडाली होती.

शंकर मिश्रावरील गंभीर आरोपांमुळे तो काम करत असलेली कंपनी वुल्फ फार्गोने त्याला नोकरीवरुन काढून टाकले आहे. कंपनीच्यावतीने एक निवेदन जारी करताना, म्हटले होते की, कंपनी आपल्या कर्मचा-यांकडून व्यावसायिक आणि वैयक्तिकरित्या योग्य वर्तनाची अपेक्षा करते. शंकर यांच्यावरील आरोप अत्यंत खेदजनक असून त्यामुळे त्यांना कंपनीतून काढून टाकण्यात येत आहे. या तपासात आम्ही पूर्ण सहकार्य करु, असेही कंपनीने म्हटले आहे.