बालकांची तस्करी करणारे रॅकेट रत्नागिरीकरांनी हाणून पाडले

रत्नागिरी (वार्ताहर) : रत्नागिरी जिल्ह्यात नवजात बालकांची खुलेआम विक्री होत असल्याचा धक्कादायक प्रकार समोर आला असून एका महिला होमगार्डच्या मध्यस्थीने मुलाची विक्री झाल्याची माहिती समोर आली आहे. संबंधित प्रकार हिंदुत्ववादी संघटनांमुळे चव्हाट्यावर आला आहे. याप्रकरणी हिंदुत्ववादी संघटनांनी रत्नागिरीतून पोलीस ठाण्यात तक्रार दिली असून अधिक तपास पो. नि. विनीत चौधरी यांच्या मार्गदर्शनाखाली सुरू आहे.

रत्नागिरी जिल्ह्यात नवजात बालकाची खुलेआम विक्री करणारे रॅकेट सक्रिय झाले की काय, असा प्रश्न जनतेला पडला असून हे रॅकेट आर्थिकदृष्ट्या खालावलेल्या कुटुंबाला लक्ष्य करते. १४ एप्रिल रोजी जिल्हा शासकीय रुग्णालयात एक महिला प्रसुतीसाठी दाखल झाली. या महिलेने १६ एप्रिलला एका मुलाला जन्म दिला होता. या प्रसुतीनंतर त्याच दिवशी या महिलेला रुग्णालयातून घरी सोडण्यात आले.

मात्र, महिलेने जन्म दिलेल्या बाळाला विकल्याची धक्कादायक माहिती समोर आली असून त्यानंतर हिंदुत्वादी संघटनांनी त्यांची पोलखोल करण्याचा चंग बांधला आणि जन्म दिलेल्या बाळाला विकल्याची धक्कादायक माहिती समोर आली आहे. एका होमगार्ड महिलेच्या मध्यस्थीने मुलाची विक्री झाल्याची माहिती प्राप्त झाली असून यामध्ये १ लाख २० हजार रुपयांना या नवजात मुलाच्या विक्रीचा व्यवसाय झाल्याची माहिती समोर आली आहे. हे रॅकेट कधीपासून सक्रिय आहे याचा तपास घेण्यासाठी पोलीस यंत्रणा सजग झाली असून त्यादृष्टीने तपास सुरू करण्यात आला आहे.