अतुल जाधव
ठाणे : ठाणे महापालिकेची निवडणूक प्रक्रिया अंतिम टप्प्यात पोहोचली असून महापालिकेने आगामी निवडणुकीसाठी प्रभाग रचनेचा अंतिम आराखडा जाहीर केला आहे. ठाणे महापालिकेने अंतिम प्रभाग रचने संदर्भातील माहिती महापालिकेच्या संकेतस्थळावर त्याचप्रमाणे महापालिका मुख्यालय या ठिकाणी सूचना फलकावर सर्व प्रभाग कार्यालये आदी ठिकाणी प्रसिद्ध करण्याबाबत प्रक्रिया सुरू करण्यात आली आहे. अंतिम प्रभाग रचनेबाबत अधीसूचना नकाशा आदी माहिती यात उपलब्ध करून देण्यात आली आहे.
२०१७मध्ये चार सदस्य असलेला प्रभाग आता नव्या आराखड्यात तीन सदस्यांचा असणार आहे. लोकसंख्या निकष लक्षात घेता प्रभागांची संख्या ४७ करण्यात आली आहे. नगरसेवकांच्या संख्येत ११ ने वाढ झाली आहे. महापालिका निवडणुकीसाठी प्रारूप आराखडा तयार करण्यात आल्यानंतर प्रभाग रचना जाहीर करण्यात आली होती. या प्रभाग रचनेवरून ठाण्यात राजकीय नाट्य रंगले होते. यानंतर नागरिकांकडून हरकती आणि सूचना मागवण्यात आल्या होत्या.
ठाणे महापालिकेची मुदत ५ मार्चला संपल्यानंतर पालिकेवर प्रशासकीय राजवट सुरू झाली होती. दरम्यान महापालिकेकडून सादर करण्यात आलेल्या प्रारूप आराखड्यावर १९६२ हरकती दाखल झाल्यानंतर त्यावर सुनावणी प्रक्रिया पूर्ण केल्यानंतर अंतिम आराखडा जाहीर करण्यात आला आहे.