अंबरनाथ : भटक्या कुत्र्यांच्या वाढत्या त्रासाचे आणखी एक गंभीर उदाहरण अंबरनाथमधून समोर आले आहे. श्वानाने लहान भावावर हल्ला केला त्यावेळी बहीण पुढे सरसावली. बहिणीने धाकट्या भावाचे रक्षण केले. भावाला वाचवण्याच्या प्रयत्नात बहीण जखमी झाली.
मंगळवारी (१० मार्च ) सकाळच्या सुमारास ही घटना घडली. भाऊ-बहिण घरी परतत असताना अचानक एका भटक्या कुत्र्याने लहान मुलावर झडप घातली. प्रसंगावधान राखत बहिणीने तात्काळ भावाला दूर केले.याच दरम्यान कुत्र्याने आपला रोख बदलत तिच्यावर हल्ला केला. तरीही तिने भावाला सुरक्षित ठेवण्याचा प्रयत्न सुरूच ठेवला. या झटापटीत ती गंभीर जखमी झाली.
मुलीने आणि तिच्या भावाचा आरडाओरडा ऐकून परिसरातील नागरिकांनी तातडीने धाव घेतली आणि दोन्ही मुलांची सुटका केली. संपूर्ण प्रकार सीसीटीव्हीत कैद झाला असून त्याचा व्हिडीओही समोर आला आहे.
या घटनेनंतर स्थानिक नागरिकांनी प्रशासनाच्या कामकाजावर प्रश्न उपस्थित करत नाराजी व्यक्त केली. भटक्या कुत्र्यांवर नियंत्रणासाठी ठोस उपाययोजना करण्याची मागणी करण्यात येत आहे.
दरम्यान, नगर परिषद प्रशासनाने घटनेची दखल घेत परिसरातील काही कुत्र्यांना ताब्यात घेऊन त्यांच्या निर्बीजीकरण आणि लसीकरणाची प्रक्रिया सुरू केली आहे. मात्र शहरातील वाढत्या भटक्या श्वानांच्या समस्येवर दीर्घकालीन उपाययोजना करण्याची गरज पुन्हा अधोरेखित झाली आहे.
