मुंबई : बॉलीवूडचे ज्येष्ठ अभिनेते धर्मेंद्र यांच्याबाबत एक दिलासादायक बातमी समोर आली आहे. मुंबईतील ब्रीच कँडी रुग्णालयात 31 ऑक्टोबरपासून दाखल असलेल्या धर्मेंद्र यांना आज सकाळी साडेसातच्या सुमारास डिस्चार्ज मिळाला आहे. गेले काही दिवस त्यांच्यावर उपचार सुरू होते आणि आता त्यांची प्रकृती स्थिर असल्याने त्यांना घरी नेण्यात आले.
बॉबी देओल स्वतः वडिलांना रुग्णवाहिकेतून घरी घेऊन गेले. कुटुंबीयांच्या माहितीनुसार, आता धर्मेंद्र यांच्यावर घरातच पुढील उपचार सुरू राहणार आहेत. काही दिवसांपूर्वी श्वसनाचा त्रास जाणवल्याने त्यांना रुग्णालयात दाखल करण्यात आले होते. त्यानंतर त्यांना आयसीयूमध्ये ठेवण्यात आले होते. या काळात चाहत्यांनी त्यांच्या आरोग्यासाठी सतत प्रार्थना केली. काल त्यांच्या निधनाची अफवा पसरल्यानंतर चाहत्यांमध्ये खळबळ माजली होती, मात्र कुटुंबीयांनी ती माहिती चुकीची असल्याचे स्पष्ट केले. कुटुंबाकडून तब्येतीची माहिती
सनी देओल आणि बॉबी देओल यांची टीम तसेच हेमा मालिनी आणि ईशा देओल सोशल मीडियाच्या माध्यमातून धर्मेंद्र यांच्या प्रकृतीबाबत वेळोवेळी माहिती देत आहेत.
या कलाकारांनी घेतली रुग्णालयात भेट
दरम्यान, धर्मेंद्र यांना भेटण्यासाठी शाहरुख खान, सलमान खान, आमिर खान, गोविंदा, अमिषा पटेल आणि त्यांचे माजी जावई भरत यांसारख्या अनेक कलाकारांनी रुग्णालयात भेट दिली होती. त्यांच्या चेहऱ्यावरील चिंता स्पष्ट जाणवत होती.
लवकरच धर्मेंद्र यांचा इक्किस हा सिनेमा प्रदर्शित होणार आहे. त्यांनी काही दिवसांपूर्वी या सिनेमाचा ट्रेलर स्वतःच्या सोशल मीडिया हँडलवर शेअर केला होता, ज्यात अगस्त्य नंदा प्रमुख भूमिकेत आहे.
