मुंबई : कोकणचा कोहिनुर असलेला हरहुन्नरी कलाकार म्हणजे 'ओंकार भोजने' पुन्हा एकदा महाराष्ट्राच्या हास्यजत्रेत घर वापसी करणार आहे. लग्नमंडपात चिडणारा मामा, अगं अगं आई म्हणत स्वतःला बिचारा दाखवणारा मुलगा आणि रसिक प्रेक्षकांना खळखळून हसवणारा हा लाडका 'भोजन्या' पून्हा एकदा हास्यजत्रेचा हास्यमंच गाजवायला सज्ज झालाय.
हास्यजत्रा सोडल्यांनंतर मध्यंतरी ओंकार आपल्याला झी मराठीच्या चला हवा येऊद्या या कार्यक्रमात दिसला होता. त्यावेळी त्याने हास्यजत्रेतून विश्रांती घेतली होती. त्याने पुन्हा या कार्यक्रमात यावे अशी चाहत्यांची इच्छा होती. प्रेक्षकांची ही प्रतीक्षा अखेर संपली असून ओंकार लवकरच हास्यजत्रेत दिसणार आहे.
ओंकारला जे पात्र मिळाले त्याला त्याने आपल्या कलेमधून जिवंत केले. म्हणूच तो प्रेक्षकांच्या जवळचा आणि लोकप्रिय झाला. त्याचं टायमिंग, त्याची संवादफेक, त्याचं सादरीकरण या सर्वांचच प्रेक्षकांनी आणि पाहुण्यांनी तोंडभरून कौतुक केलं. अंग अंग आई हे त्याचं विशेष गाजलेलं पात्र आणि साईन कॉस थिटा म्हणण्याच्या पद्धतीने प्रेक्षकांना नेहमीच पोट धरून हसायला भाग पाडले . मिळालेल्या माहितीनुसार, ओंकार लवकरच हास्यजत्रेत झळकणार असून चित्रीकरणालाही सुरुवात झाली आहे.
