खोपोली : पिकअप टेम्पोंमधून जवळपास आठ कोटी चांदी एक्सप्रेसवेवरील खालापूर टोलनाक्यावर खालापूर पोलीस आणि भरारी पथकाने जप्त केली. ही घटना शुक्रवारी पहाटे साडेसहा वाजण्याच्या सुमारास घडली. विधानसभेच्या निवडणुकीत पोलिसांनी केलेल्या या धडाकेबाज कारवाईने राजकीय वर्तुळात खळबळ उडाली आहे.
एक्सप्रेसवरून एका गाडीतून मौल्यवान वस्तू घेऊन जात असल्याची गुप्त माहिती खालापूर उपविभागीय पोलीस अधिकारी विक्रम कदम, खालापूर पोलीस ठाण्याचे पोलीस निरीक्षक सचिन पवार यांना मिळाल्यावर खालापूर टोलनाक्यावर संशयित पिकअप टेम्पो एमएच.०१.ईएम.८७७५ क्रमांकाच्या टेम्पोची तपासणी केली असता या टेम्पोमध्ये १७१ कुरिअर बॅगमध्ये जवळपास ८ कोटी रुपयांची चांदी जप्त करण्यात आली.
खालापूर उपविभागीय पोलीस अधिकारी विक्रम कदम यांच्या मार्गदर्शनाखाली पोलीस निरिक्षक सचिन पवार सह इतर टीमने ही कारवाई केली.
