केंद्रीय रेल्वे मंत्री अश्विनी वैष्णव आणि खासदार रमेश अवस्थी यांनी आज ‘कानपूर एक्सप्रेस’ला हिरवा झेंडा दाखवला. ही रेल्वे कानपूर सेंट्रल ते आनंद विहार टर्मिनल दरम्यान दोन्ही दिशांना दररोज धावणार आहे. या नवीन दैनंदिन रेल्वेसेवेमुळे उत्तर प्रदेश आणि राष्ट्रीय राजधानी क्षेत्रादरम्यानचा रेल्वे संपर्क अधिक मजबूत होणार आहे. कानपूर आणि दिल्ली दरम्यान प्रवास करणाऱ्या प्रवाशांना प्रवासासाठी आणखी एक पर्याय उपलब्ध होणार आहे. ४२८ किलोमीटर अंतर कापणाऱ्या या रेल्वेत २२ आधुनिक एलएचबी कोच असतील. ही रेल्वे मार्गातील अनेक महत्त्वाच्या शहरांना आणि आर्थिक केंद्रांना जोडणार आहे. या सेवेचा फफूंदच्या प्रवाशांना फायदा होणार आहे. फफूंद हे औरैयाच्या औद्योगिक क्षेत्रांसाठी आणि एनटीपीसी औरैया व गेल पाता यांसारख्या प्रमुख आस्थापनांसाठी महत्त्वाचे आहे. त्याचबरोबर शेतीचे प्रमुख केंद्र इटावा आणि काच उद्योगासाठी प्रसिद्ध असलेल्या फिरोजाबाद क्षेत्रातील टूंडला येथील प्रवाशांनाही सुविधा मिळणार आहे.
ही रेल्वे हाथरसला जोडणार आहे. तसेच अलीगढ आणि खुर्जा यांनाही चांगला रेल्वे संपर्क मिळणार आहे. पुढे महत्त्वाचे लॉजिस्टिक्स केंद्र दादरी आणि एनसीआरमधील प्रमुख औद्योगिक केंद्र गाझियाबादमार्गे ही रेल्वे आनंद विहार टर्मिनलला पोहोचेल. या सेवेमुळे उत्तर प्रदेशचे प्रमुख औद्योगिक, चामडे आणि शैक्षणिक केंद्र असलेल्या कानपूरचा दिल्लीतील आनंद विहार टर्मिनलशी थेट संपर्क होणार आहे. यावेळी वैष्णव यांनी कानपूरकरांना शुभेच्छा दिल्या. मुख्यमंत्री योगी आदित्यनाथ यांनीही या सेवेच्या शुभारंभाबद्दल कानपूरच्या जनतेला शुभेच्छा दिल्याचे त्यांनी सांगितले.
https://www.prahaar.in/2026/11/16/curb-fake-content-and-misleading-advertisements-ashwini-vaishnaws-warning-to-social-media-companies/
कानपूरमधील आगामी रेल्वे प्रकल्पांबाबत बोलताना वैष्णव म्हणाले, अन्वरगंज ते मंधना दरम्यान १६ किमी लांबीचा एलिव्हेटेड रेल्वे ट्रॅक बांधला जाणार आहे. यामुळे रेल्वे क्रॉसिंगवरील वाहतूक कोंडीची अनेक दशकांपासूनची समस्या कायमची सुटेल. या प्रकल्पाचा सविस्तर अहवाल तयार असून आवश्यक मंजुऱ्याही मिळाल्या आहेत. लवकरच बांधकाम सुरू होईल. बुलेट ट्रेनबाबत बोलताना ते म्हणाले, बुलेट ट्रेनचा नॉर्थ कॉरिडॉर कानपूरच्या विकासात नवा अध्याय जोडेल. हा कॉरिडॉर दिल्ली, आग्रा, कानपूर, वाराणसी, लखनौ, अयोध्या यांना जोडत पुढे पाटणा, सिलीगुडी आणि गुवाहाटीपर्यंत जाणार आहे. यानंतर दिल्ली ते कानपूर प्रवास अवघ्या १ तास ४५ मिनिटांत पूर्ण होईल. लखनौ ते कानपूर २७ मिनिटांत आणि कानपूर ते प्रयागराज १ तास १५ मिनिटांत जाता येईल.