नाशिक : प्रभू श्रीरामांच्या पदस्पर्शाने पावन झालेल्या नाशिकच्या गोदातीरावर आज सिंहस्थ कुंभपर्व २०२६-२०२८ चा अधिकृत आणि मंगलमय शुभारंभ झाला. भारताच्या राष्ट्रपती द्रौपदी मुर्मू यांच्या शुभहस्ते मंत्रोच्चार आणि लाखो भाविकांच्या जयघोषात नाशिकच्या पवित्र रामकुंडावर हा भव्य धर्मध्वजारोहण सोहळा दुपारी १२ वाजून २ मिनिटांच्या मुहूर्तावर अत्यंत उत्साहात संपन्न झाला. शनिवार, ३१ ऑक्टोबर २०२६ रोजी उभारण्यात आलेल्या या धर्मध्वजाने कुंभपर्वाचा आरंभ झाला असून, २४ जुलै २०२८ पर्यंत हा आध्यात्मिक महासोहळा चालणार आहे. या पर्वातील पहिले अमृतस्नान २ ऑगस्ट २०२७ रोजी होणार आहे.
राष्ट्रपती द्रौपदी मुर्मू यांच्या हस्ते रामकुंडावर धार्मिक विधींना प्रारंभ!
सकाळी राष्ट्रपतींचे गोदातीरावर आगमन झाल्यानंतर त्यांनी पवित्र रामकुंडावर विधिवत गंगापूजन आणि अर्घ्यदान करून धार्मिक विधींना प्रारंभ केला. यावेळी वेदमंत्रांच्या जयघोषात त्यांनी धर्मध्वजाची शास्त्रोक्त पूजा केली. त्यानंतर दुपारी ठरलेल्या शुभमुहूर्तावर नाशिकच्या रामकुंडावर राष्ट्रपतींच्या हस्ते धर्मध्वजारोहण सोहळा पार पडला.
या ऐतिहासिक सोहळ्याला राज्यपाल जिष्णू देव वर्मा, उपमुख्यमंत्री एकनाथ शिंदे, उपमुख्यमंत्री सुनेत्राताई अजित पवार, केंद्रीय आयुष तसेच आरोग्य व कुटुंब कल्याण राज्यमंत्री प्रतापराव जाधव, पालकमंत्री गिरीश महाजन, मत्स्यव्यवसाय व बंदरे मंत्री नितेश राणे, अन्न, नागरी पुरवठा व ग्राहक संरक्षण मंत्री छगन भुजबळ, पाणीपुरवठा व स्वच्छता मंत्री गुलाबराव पाटील, शालेय शिक्षण मंत्री दादाजी भुसे, पणन व राजशिष्टाचार मंत्री जयकुमार रावल, वस्त्रोद्योग मंत्री संजय सावकारे, अन्न व औषध प्रशासन तथा विशेष सहाय्य मंत्री नरहरी झिरवाळ, महापौर हिमगौरी आडके-आहेर आदी उपस्थित होते.
https://www.prahaar.in/2026/10/31/flag-hoisting-ceremony-performed-by-the-chief-minister-at-trimbakeshwar-marks-the-commencement-of-the-religious-proceedings-of-the-simhastha-kumbh-mela/
त्यासोबतच या पवित्र सोहळ्याला विविध आखाड्यांचे महंत, धर्माचार्य आणि साधू-संतांच्या उपस्थितीने विलक्षण आध्यात्मिक उंची प्राप्त झाली. जगद्गुरू श्रीमद् रामानंदाचार्य नरेंद्राचार्य महाराज, श्रीमहंत ज्ञानदास महाराज, मंगलपीठाधीश्वर श्री १००८ माधवाचार्य महाराज, अखिल भारतीय आखाडा परिषदेचे अध्यक्ष श्रीमहंत रवींद्रपुरी महाराज, श्री पंच निर्मोही अग्नी आखाड्याचे श्रीमहंत राजेंद्रदास महाराज, महंत संजयदास महाराज, श्रीमहंत मुरलीदास महाराज, श्रीमहंत वैष्णवदास महाराज, पंच दिगंबर अग्नी आखाड्याचे श्रीमहंत माधवदास महाराज, श्रीमहंत मोहनदास महाराज, महंत भक्तिचरणदास महाराज आणि महंत रामस्नेही महाराज यांच्यासह साधू-संत व भाविक या ऐतिहासिक क्षणाचे साक्षीदार ठरले. विविध आखाड्यांच्या संतपरंपरेचा संगम घडविणाऱ्या या उपस्थितीने रामतीर्थावर भक्ती, ज्ञान, तपश्चर्या आणि अध्यात्माचे अनोखे विश्व साकारले. धार्मिक विधींचे पौरोहित्य पुरोहित संघाचे सतीश शुक्ल आणि अध्यक्ष चंद्रशेखर पंचाक्षरी यांनी केले
या सोहळ्यास आमदार सुहास कांदे, गोकुळ गिते, राहुल ढिकले, देवयानी फरांदे, सीमा हिरे, सरोज अहिरे, दिलीप बनकर विभागीय आयुक्त डॉ. प्रवीण गेडाम, सिंहस्थ कुंभमेळा प्राधिकरणाचे आयुक्त शेखर सिंह, उपमहापौर विलास शिंदे, महानगरपालिका आयुक्त मनीषा खत्री, नाशिक महानगर प्रदेश विकास प्राधिकरणाचे महानगर आयुक्त जलज शर्मा, जिल्हाधिकारी आयुष प्रसाद, सार्वजनिक बांधकाम विभागाच्या मुख्य अभियंता अरुंधती शर्मा, अधीक्षक अभियंता देवेंद्र पवार, प्राधिकरणाचे अतिरिक्त आयुक्त कमलाकर रणदिवे आणि प्रमोद पवार आदी अधिकारी उपस्थित होते.
विविध उपक्रमांचे लोकार्पण आणि आज संध्याकाळचे कार्यक्रम :
मुख्य सोहळ्यात २५१ वादकांच्या शंखनादाने अवघा परिसर दुमदुमणार आहे, तर २५ ऑक्टोबरच्या ५०१ शंखवादकांच्या विश्वविक्रमाचे अधिकृत ‘गिनीज वर्ल्ड रेकॉर्ड’ प्रमाणपत्र याच मंचावर सुपूर्द केले जाईल. यासोबतच कुंभ गान, विशेष टपाल तिकीट, कॉफी टेबल बुक आणि कुंभमेळा प्राधिकरणाच्या अधिकृत पोर्टलचे लोकार्पण आज राष्ट्रपतींच्या हस्ते होणार आहे.
दरम्यान, सर्वांचे लक्ष लागले आहे ते आज संध्याकाळी याच रामकुंडावर होणाऱ्या भव्य गंगा-गोदावरी महाआरतीकडे. हजारो आदिवासी बांधवांच्या सहभागाने ही महाआरती सायंकाळी ६:३० ते ७ च्या दरम्यान संपन्न होणार असून, तब्बल एक लाख भाविक गोदातीरावर दाखल होण्याचा अंदाज आहे. सुरक्षेच्या कारणास्तव प्रशासनाने दुपारी ४:३० पूर्वीच भाविकांना जागा घेण्याचे आवाहन केले आहे.