मुंबई : मध्य रेल्वेकडून विद्याविहार रेल्वे स्थानक येथे मधल्या पादचारी पुलासाठी गर्डर टाकण्याचे काम हाती घेण्यात येणार आहे. या कामासाठी १५ ते १८ मे दरम्यान विविध रात्री विशेष वाहतूक ब्लॉक घेण्यात येणार आहेत. हा ब्लॉक कुर्ला ते भांडुप दरम्यान राहणार असून, काही उपनगरी लोकल गाड्यांचे मार्गांतर, शॉर्ट टर्मिनेशन तसेच काही फेऱ्या रद्द करण्यात येणार आहेत. १५ व १६ मे, १६ व १७ मे आणि १७ व १८ मे च्या मध्यरात्री विविध वेळांमध्ये ब्लॉक घेण्यात येईल. या कालावधीत पादचारी पुलाच्या गर्डरचे काम सुरक्षितपणे पूर्ण करण्यात येणार आहे.

ब्लॉकचे वेळापत्रक :

१५ व १६ मे : रात्री १.१५ ते पहाटे ४.१५

१६ व १७ मे : रात्री १२.१० ते पहाटे ४.४०

१७ व १८ मे : रात्री १.१५ ते पहाटे ३.०५

कुर्ला (स्थानक वगळून) ते भांडुप (क्रॉसओव्हर वगळून) दरम्यान अप आणि डाउन धीम्या मार्गावर, तसेच काही दिवशी जलद मार्ग, पाचवा आणि सहावा मार्ग यावर ब्लॉक घेण्यात येणार आहे.१६ व १७ मेच्या रात्री काही कर्जत, कसारा, बदलापूर आणि अंबरनाथ लोकलचे मार्गांतर करण्यात येणार असून त्या विद्याविहार,कांजूरमार्ग आणि नाहूर स्थानकांवर थांबणार नाहीत. याशिवाय काही उपनगरी फेऱ्या रद्द करण्यात आल्या आहेत. ठाणे-कुर्ला, ठाणे-सीएसएमटी तसेच सीएसएमटी-ठाणे या काही उशिराच्या लोकल फेऱ्या चालणार नाहीत. काही वातानुकूलित लोकल आणि उपनगरी गाड्या कुर्ला किंवा ठाणे स्थानकांपर्यंतच धावतील. तसेच काही पहाटेच्या फेऱ्या बदललेल्या स्थानकांवरून सुरू करण्यात येतील. मात्र,१५ व १६ मे आणि १७ व १८ मे रोजी धावणाऱ्या नियमित लोकल सेवांवर मोठा परिणाम होणार नसल्याचे मध्य रेल्वेने स्पष्ट केले आहे. मेल आणि एक्सप्रेस गाड्यांवरही विशेष परिणाम होणार नाही.