मुंबई : पश्चिम आशियामध्ये वाढलेल्या भू-राजकीय तणावाचा थेट परिणाम भारतीय शेअर बाजारावर दिसून आला असून शुक्रवारी सुरुवातीच्या व्यवहारात मुंबई शेअर बाजार (बीएसई) आणि राष्ट्रीय शेअर बाजार (एनएसई) या दोन्ही निर्देशांकांमध्ये मोठी घसरण नोंदवली गेली. वाढत्या कच्च्या तेलाच्या किमती, परदेशी गुंतवणूकदारांकडून होत असलेली सततची विक्री आणि जागतिक बाजारांतील नकारात्मक वातावरण यामुळे गुंतवणूकदारांचा आत्मविश्वास डळमळीत झाला आहे. त्यामुळे बाजारात सावध आणि दबावाचे वातावरण निर्माण झाले आहे.

शुक्रवारी व्यवहार सुरू होताच मुंबई शेअर बाजाराचा (बीएसई) सेन्सेक्स ३५३.५० अंकांनी घसरून ७७,४९१.०२ अंकांवर पोहोचला. त्यानंतर घसरण आणखी वाढत गेली आणि सेन्सेक्स ५३६.६६ अंकांनी कोसळून ७७,३३१.७५ अंकांवर व्यवहार करत होता. राष्ट्रीय शेअर बाजाराचा (एनएसई) निफ्टी निर्देशांकही १०९.२५ अंकांनी घसरून २४,२२५.२० अंकांवर आला. पुढील व्यवहारात निफ्टीमध्ये आणखी घसरण होऊन तो १६६.९५ अंकांच्या तोट्यासह २४,१७०.८० अंकांवर व्यवहार करत होता.

https://prahaar.in/2026/05/08/what-is-the-rank-of-nashik-division-in-the-10th-result/

सेन्सेक्समधील प्रमुख कंपन्यांच्या शेअर्समध्ये मोठी घसरण दिसून आली. महिंद्रा अँड महिंद्रा, अॅक्सिस बँक, एचडीएफसी बँक, इटरनल, बजाज फायनान्स आणि टाटा स्टील यांच्या शेअर्समध्ये विक्रीचा दबाव वाढला. दुसरीकडे एशियन पेंट्स, टेक महिंद्रा, अदानी पोर्ट्स आणि एचसीएल टेक यांच्या शेअर्समध्ये काही प्रमाणात तेजी दिसून आली.

दरम्यान, आंतरराष्ट्रीय बाजारात कच्च्या तेलाच्या किमतींमध्ये मोठी वाढ झाली आहे. जागतिक तेल निर्देशांक ब्रेंट क्रूडचा भाव १.१९ टक्क्यांनी वाढून प्रति बॅरल १०१.३ अमेरिकन डॉलरवर पोहोचला आहे. पश्चिम आशियातील तणावामुळे तेल पुरवठ्यावर परिणाम होण्याची भीती व्यक्त केली जात असून त्यामुळे तेलाच्या किमतींमध्ये चढ-उतार सुरू आहेत.

चलन बाजारातही भारतीय रुपयावर दबाव दिसून आला. शुक्रवारी सुरुवातीच्या व्यवहारात रुपया अमेरिकन डॉलरच्या तुलनेत ४५ पैशांनी घसरून ९४.६७ या पातळीवर पोहोचला. आंतरबँक विदेशी चलन विनिमय बाजारात रुपया ९४.५८ प्रति डॉलरवर खुला झाला होता, मात्र नंतर त्यात आणखी कमजोरी आली. गुरुवारी रुपया सुरुवातीच्या तोट्यातून सावरत २७ पैशांच्या वाढीसह ९४.२२ प्रति डॉलरवर बंद झाला होता.

https://prahaar.in/2026/05/08/pune-crime-news-six-minor-girls-missing-in-two-days-police-investigation/

सहा प्रमुख जागतिक चलनांच्या तुलनेत अमेरिकन डॉलरची ताकद दर्शवणारा डॉलर निर्देशांक ०.१४ टक्क्यांच्या वाढीसह ९८.२० वर पोहोचला. डॉलर मजबूत होत असल्याने उदयोन्मुख बाजारांतील चलनांवर दबाव वाढताना दिसत आहे. आशियाई बाजारांमध्येही नकारात्मक वातावरण दिसून आले. दक्षिण कोरियाचा कोस्पी निर्देशांक, जपानचा निक्केई २२५ निर्देशांक, शांघायचा एसएसई कंपोझिट निर्देशांक आणि हाँगकाँगचा हँगसेंग निर्देशांक घसरणीसह व्यवहार करत होते. अमेरिकन शेअर बाजारदेखील गुरुवारी घसरणीसह बंद झाले होते.

विदेशी संस्थात्मक गुंतवणूकदारांनी गुरुवारी भारतीय बाजारातून ३४०.८९ कोटी रुपयांच्या शेअर्सची विक्री केली. सततच्या परदेशी निधी बाहेर जाण्यामुळे भारतीय बाजारावरील दबाव अधिक वाढताना दिसत आहे. गुरुवारीच्या व्यवहारात मुंबई शेअर बाजाराचा सेन्सेक्स ११४ अंकांनी म्हणजेच ०.१५ टक्क्यांनी घसरून ७७,८४४.५२ अंकांवर बंद झाला होता. तर राष्ट्रीय शेअर बाजाराचा निफ्टी ४.३० अंकांच्या किरकोळ घसरणीसह २४,३२६.६५ अंकांवर बंद झाला होता.