मुंबई : काल म्हणजेच गुरुवार ७ मे रोजी झालेल्या आयपीएल सामन्यात लखनऊ सुपर जायंट्सने रॉयल चॅलेंजर्स बंगळुरू (आरसीबी)चा नऊ धावांनी पराभव केला. इकाना स्टेडियमवर पावसामुळे प्रभावित झालेला हा सामना १९-१९ षटकांचा करण्यात आला होता. डकवर्थ-लुईस (डीएलएस) नियमानुसार आरसीबीसमोर २१३ धावांचे सुधारित लक्ष्य ठेवण्यात आले होते. मात्र, संघाला १९ षटकांत सहा गडी गमावून २०३ धावाच करता आल्या. लखनऊचा या हंगामातील ही तिसरी विजय ठरली, तर आरसीबीला चौथ्या पराभवाचा सामना करावा लागला.

लक्ष्याचा पाठलाग करताना आरसीबीची सुरुवात अत्यंत खराब झाली. जेकब बेथेल अवघ्या चार धावा करून मोहम्मद शमीचा बळी ठरला. त्यानंतर प्रिन्स यादवने शानदार चेंडूवर विराट कोहलीला खातेही उघडू न देता बाद केले. कोहली तब्बल ४६ डावांनंतर आयपीएलमध्ये शून्यावर बाद झाला.फक्त नऊ धावांवर दोन विकेट्स गेल्यानंतर कर्णधार रजत पाटीदार आणि देवदत्त पडिक्कल यांनी संघाचा डाव सावरला. दोघांनी तिसऱ्या विकेटसाठी ५३ चेंडूंमध्ये ९५ धावांची महत्त्वपूर्ण भागीदारी केली. पडिक्कलने २५ चेंडूंमध्ये ३४ धावा केल्या, तर पाटीदारने आक्रमक फलंदाजी करत ३१ चेंडूंमध्ये ६१ धावांची शानदार खेळी साकारली. त्याच्या खेळीत तीन चौकार आणि सहा षटकारांचा समावेश होता.

https://prahaar.in/2026/05/08/good-news-for-rail-passengers-bengaluru-mumbai-superfast-train-likely-to-hit-tracks-by-june-end-vande-bharat-sleeper-may-follow-soon/

मात्र त्यानंतर आरसीबीने नियमित अंतराने विकेट्स गमावल्या. जितेश शर्मा पुन्हा एकदा प्रभाव पाडण्यात अपयशी ठरला आणि केवळ एका धावेवर बाद झाला. खालच्या फळीत टिम डेविडने तुफानी फलंदाजी करत १७ चेंडूंमध्ये ४० धावा केल्या. त्याच्या खेळीत चार चौकार आणि तीन षटकार होते. क्रुणाल पंड्याने १६ चेंडूंमध्ये नाबाद २८ धावा केल्या, तर रोमारियो शेफर्ड १५ चेंडूंमध्ये २३ धावांवर नाबाद राहिला. मात्र, तरीही आरसीबीला लक्ष्य गाठता आले नाही आणि संघ नऊ धावांनी मागे राहिला.

लखनऊकडून प्रिन्स यादवने उत्कृष्ट गोलंदाजी करत चार षटकांत ३३ धावा देत तीन विकेट्स घेतल्या. शाहबाज अहमदने दोन विकेट्स मिळवल्या, तर मोहम्मद शमीला एक यश मिळाले.

https://prahaar.in/2026/05/08/stock-market-news-stock-markets-fall-sharply-in-early-trading-due-to-tensions-in-west-asia/

त्याआधी नाणेफेक जिंकून प्रथम फलंदाजी करताना लखनऊ सुपर जायंट्सने निर्धारित २० षटकांत तीन विकेट्स गमावून २०९ धावा केल्या. मिचेल मार्शने स्फोटक फलंदाजी करत ५६ चेंडूंमध्ये १११ धावांची शानदार खेळी केली. त्याने आपल्या डावात नऊ चौकार आणि नऊ षटकार लगावले. मार्शने युवा फलंदाज अर्शिन कुलकर्णीसोबत पहिल्या विकेटसाठी ९५ धावांची भागीदारी केली. अर्शिन १७ धावा करून बाद झाला. त्यानंतर निकोलस पूरनने २३ चेंडूंमध्ये ३८ धावांची झंझावाती खेळी केली आणि मार्शसोबत दुसऱ्या विकेटसाठी ७० धावांची भागीदारी उभारली.

https://prahaar.in/2026/05/08/nashik-tcs-case-who-is-that-mim-corporator-who-hid-nida-khan-big-information-revealed/

अखेरच्या षटकांमध्ये कर्णधार ऋषभ पंतने अवघ्या १० चेंडूंमध्ये नाबाद ३२ धावा फटकावत संघाला २०० धावांचा टप्पा पार करून दिला. पंतच्या खेळीत चार चौकार आणि दोन षटकारांचा समावेश होता. आरसीबीकडून जोश हेजलवूड, क्रुणाल पंड्या आणि रसिख सलाम यांनी प्रत्येकी एक विकेट घेतली.