मुंबई : मुंबईच्या महापौर ऋतू तावडे (Ritu Tawde) यांचे पती असल्याचा खोटा दावा करत एका फोटोग्राफी शिक्षकाची बदनामी करणारा व्हिडिओ यूट्यूबवर प्रसारित करण्यात आल्याची घटना समोर आली आहे. संबंधित शिक्षकाच्या फोटोचा वापर करून त्यांच्याबाबत चुकीची आणि दिशाभूल करणारी माहिती व्हिडिओमध्ये देण्यात आली. या प्रकरणी कालाचौकी पोलिसांनी गुन्हा दाखल केला असून व्हिडिओ तयार करणाऱ्या व्यक्तीचा शोध सुरू आहे.
पोलिसांत दाखल तक्रारीनुसार, तक्रारदार लालबाग परिसरात राहतात आणि फोटोग्राफीचे प्रशिक्षण देतात. त्यांचा कणकवली येथे फोटोग्राफी स्टुडिओ असून, सोशल मीडियाच्या माध्यमातून ते आपल्या क्लासेसची माहिती देतात. त्यांचे 'OCL' नावाचे यूट्यूब चॅनलही असल्याचे तक्रारीत नमूद करण्यात आले आहे. (Mumbai Mayor)
26 ऑगस्ट रोजी रात्री एका महिलेने तक्रारदाराला व्हॉट्सॲपवर यूट्यूब व्हिडिओची लिंक पाठवली. लिंक उघडल्यानंतर 'GK-Shorts-Videos' या चॅनलवर 'राजनीता ऋतू तावडे के पति राजेश तावडे का जीवन परिचय' या नावाचा शॉर्ट व्हिडिओ आढळला. या व्हिडिओमध्ये तक्रारदाराचा फोटो वापरून त्यांना महापौर ऋतू तावडे यांचे पती म्हणून दाखवण्यात आले होते.
https://www.prahaar.in/2026/08/30/heart-wrenching-how-a-pregnant-girlfriend-was-eliminated-one-plot-by-the-boyfriend-and-it-was-all-over-police-action-causes-a-stir/व्हिडिओमध्ये त्यांच्याबाबत बिल्डर, बांधकाम व्यावसायिक, बी.कॉम शिक्षण घेतलेली व्यक्ती तसेच क्रिकेट आणि प्रवासाची आवड असल्याचे दावे करण्यात आले होते. मात्र, ही माहिती चुकीची असल्याचे तक्रारदाराने पोलिसांना सांगितले. त्यांचा फोटो फेसबुकवरून आणि महापौरांचा फोटो सोशल मीडियावरून घेण्यात आल्याचा आरोपही करण्यात आला आहे.
हा व्हिडिओ 23 ऑगस्ट रोजी अपलोड करण्यात आला होता. संबंधित चॅनलवर राजकीय नेते आणि मनोरंजन क्षेत्रातील व्यक्तींशी संबंधित विविध व्हिडिओ असल्याचे तपासात समोर आले आहे. तक्रारदाराने व्हिडिओचे स्क्रीनशॉट आणि इतर माहिती पोलिसांकडे दिली आहे. ( Kalachowki Police)
या प्रकरणी कालाचौकी पोलिसांनी बदनामीसह संबंधित कलमांखाली गुन्हा दाखल केला आहे. व्हिडिओ कोणी तयार केला, तो कोणत्या उद्देशाने प्रसारित करण्यात आला आणि त्यामागे आणखी कोणाचा सहभाग आहे का, याचा तपास पोलीस करत आहेत. ( Defamation Case)
